Çdo herë e më shumë, njerëzit po u shmangen lajmeve, duke i konsideruar depresive dhe të mërzitshme, sipas një hulumtimi global, të kryer nga Instituti Reuteres i Universitetit të Oksfordit.
Pothuajse katër në 10 njerëz, 39 për qind, në gjithë botën, kanë thënë se shpesh ose ndonjëherë u shmangen me qëllim lajmeve, në krahasim me 29 për qind më 2017, sipas hulumtimit.
Lufta në Ukrainë dhe ajo në Lindje të Mesme mund të kenë kontribuuar në dëshirën e njerëzve për të qenë larg lajmeve, kanë thënë autorët e raportit. Sipas tyre, injorimi i lajmeve tani është në nivele rekorde.
Një total prej 94.943 të rinjve në 47 shtete në gjithë botën, janë anketuar nga organizata YouGov në janar dhe shkurt për qëllime të raportit këtë vit.
Këto gjetje janë bërë të ditura kur miliarda njerëz në gjithë botën kanë votuar ose do të votojnë më 2024 për zgjedhje kombëtare dhe rajonale. Raporti ka gjetur që zgjedhjet e kanë rritur interesimin në lajme në disa vende, përfshirë Shtetet e Bashkuara. Megjithatë, trendi në përgjithësi është negativ, sipas studimit.
Në gjithë botën, 46 për qind e njerëzve kanë thënë se janë jashtëzakonisht të interesuar në lajme, nga 63 për qind që kanë dhënë këtë përgjigje në vitin 2017.
Rezultatet kanë treguar që audienca e televizionit dhe gazetave të printuara ka rënë ndjeshëm në dekadën e fundit, pasi të rinjtë po preferojnë që lajmet t’i shohin në faqe online apo në rrjete sociale.
Plaforma më e rëndësishme për lajme është ende Facebook-u, ndonëse po shënon rënie vit pas viti. YouTube dhe WhatsApp janë platforma shumë të rëndësishme për lajme për një pjesë të audiencës, teksa TikTok-u është në rritje dhe e ka tejkaluar platformën X për herë të parë.
Sipas gjetjeve, 13 për qind e njerëzve e përdorin TikTok-un për lajme, në krahasim me 10 për qind që janë deklaruar për X. Shifra është e më lartë për TikTok-un te grupmosha 18-24 vjeç, me 23 për qind./ REL
Top Channel
