Beteja për vulën e PD, Indrit Sefa: Gjykata e Lartë të zbardhë vendimin, Apeli t’i japë zgjidhje

Sipas Sefës, vendimi që u mor nga Gjykata e Lartë është i njëjti me qëndrimin e mbajtur nga ana e tyre para Gjykatës së Apelit. Gjatë gjykimit në Apel, sipas tij, PD kërkoi shqyrtimin në themel të çështjes dhe zgjidhjen përfundimtare të saj nga ajo Gjykatë, kërkesë që nuk u mor parasysh.

“Prej më së dy vitesh, Partia Demokratike ka kërkuar të përballet me të gjitha provat në një debat në seancë gjyqësore, e drejtë e cila është mohuar me anë të veprimeve dhe vendimeve procedurale, që më në fund Gjykata e Larte i pranoi si të drejta. Vendimi i Gjykatës së Lartë detyron Gjykatën e Apelit për zgjidhjen e shpejtë dhe përfundimtare të çështjes duke bërë të mundur vendosjen e drejtësisë së vonuar për çështjen gjyqësore të PD-së”, thuhet në deklaratë.

Sefa e quajti “një hap shumë pozitiv për të gjithë shqiptarët dhe demokratët që në një kohë të shkurtër do të shohin të përfundojë një teatër i stisur nga aleanca e kullave që kërkojnë ta mbajnë PD-në peng të interesave të tyre.”

“Vendimi i djeshëm i Gjykatës së Lartë nuk cenon në asnjë formë dhe mënyrë legjitimitetin e organet drejtuese dhe funksionimin e strukturave të Partisë Demokratike, e cila vijon procesin e riorganizimit të brendshëm, përgatitjen e platformës dhe programit politik të saj, identifikimin dhe propozimin e kandidatëve për deputetë dhe përgatitjen për zgjedhjet e ardhshme parlamentare.

Partia Demokratike i kërkon Gjykatës së Lartë që në një kohë sa më të shkurtër të zbardhë vendimin e djeshëm dhe ti japë mundësi Gjykatës së Apelit të shqyrtojë sa më shpejtë këtë çështje dhe ti japë zgjidhje përfundimtare”, thuhet më tej në deklaratë, krahas një dokumenti të publikuar, të marrë nga nga Gjykata e Shkallës së Parë të Juridiksionit të Përgjithshëm që vërteton se Lulzim Basha është kryetar i PD.

Top Channel