Zbulohet artisti ‘më i rrezikshëm’ i rrugës në Britani, bir i doktorit që shkaktoi më shumë se $1mln dëme me piktura në fasada

Sam Moore është “demaskuar” nga mediat pasi qindra simbole të tij me firmën “10 Foot” janë pikturuara me spraj në ura, mure, ndërtesa e fasada në Londër, shkruan Daily Mail.

Vetëm kohët e fundit ‘10 Foot’ ishte mburrur se arti i tij po bëhej global dhe se me firmën e tij po tërhiqte interesin e firmave të mëdha të modës, muzikës apo biznesit për sponsorizime.

Duke listuar vendet ku marka e tij ‘10 Foot’ është parë, Moore përmend Parisin, Berlinin, New York, Philadelphia, Buenos Aires, Lisbon, Oslo e Copenhagen mes të tjerave.

Duke përdorur si pikë kontakti një dyqan librash anarkistë në Kennington, në qendër të Londrës, Moore thotë se kredencialet e tij si artist po rriten me shpejtësi.

Por të tjerë kanë vërejtur se Moore nuk i përket shtresave të varfra apo anarkiste, teksa vjen nga një familje e pasur dhe është rritur në një vilë rurale me vlerë £750,000 me nënën e tij Judith Moore dhe njerkun David McMullen, të dy doktorë në pension.

Edhe babai tij Michael ka pranuar se i biri është artisti ‘10 Foot’ – por refuzon të përfshihet me artin e tij.

Një prej miqve të artistit thotë se ai ra në shoqëri të keqe kur u vendos në Londër nga veriu i Anglisë, duke u përfshirë me grupin e artistëve të rrugës ‘Diabolical Dubstars’, të njohur me firmat e tyre Tox, Save e CK.

Policia e ka arrestuar atë në 2010 kur u kap ‘me presh në duar’ duke pikturuar urën Hungerford Bridge me firmën e tij ’10 Foot’ tag.

Nena Judith, 62 vjeçe, tha asokohe se ishte e zemërthyer kur djali i madh u dënua me dy vjet burg për 25 shkelje kriminale.

Megjithse identiteti i Moore njihet nga kolegët e tij artistë-vandalë që spërkasin me bojë ndërtesat ai përpiqet të ruajë një profil të ulët që të mos arrestohet përsëri.

Dhe në fakt e vetmja fotografi e Moore është ajo e 10 vjetëve më parë kur u burgos.

Top Channel