Nëna e djalit të ministrit Bledi Çuçi ka reaguar pas deklaratës së Sali Berishës se djali, Endi Çuçi, është arrestuar në Itali për kontrabandë ilaçesh.
Sipas Zhaklina Petos, ajo dhe djali i saj nuk kanë asnjë problem me drejtësinë italiane, “pavarësisht përmendjes në mënyrë rastësore në një hetim të drejtësisë italiane që s’ka të bëjë fare me ne”.
Në një status të gjatë në rrjetin social “Facebook”, Peto tregon se ka qëndruar në Itali për disa muaj në vitin 2021, pasi është kujdesur për të ëmën e sëmurë. Askush nuk ka të drejtë që për qëllime tërësisht politike të na linçojë dhe dënojë publikisht, shkruan ajo më tej.
Me shqetësim shumë të madh dhe tepër e indinjuar dua të përgënjeshtroj të gjitha akuzat e pavërteta dhe të shëmtuara të cilat kanë dalë në media dhe që drejtohen ndaj meje personalisht dhe djalit tim Endi Çuçi.
Ish-kryeministri ka postuar në rrjetin e tij social dhe disa dokumenta që ja ka dërguar një qytetar dixhital nga autoritete gjyqësore italiane dhe pretendon se djali i ministrit të brendshëm dhe disa persona të tjerë janë marrë në hetim për kontrabandë ilaçesh si dhe pretendohet se pacientë shqiptare merrnin karta shëndeti të falsifikuara në Itali gjatë pandemisë.
Reagimi i plotë i Zhaklia Petos:
Që në fillim dua t’ju sqaroj se as unë dhe as djali im nuk kemi probleme me drejtësinë italiane pavarësisht përmendjes në mënyrë rastësore në një hetim të drejtësisë italiane që s’ka të bëjë fare me ne. Kjo është e cilësuar fare qartë edhe në fashikullin e hetimit të cilin e keni bashkëlidhur dhe po e citoj:
…’Në shqyrtimin e fakteve që lidhet me paragrafin në fjalë, bëjmë me dije që në fillim se elementet që kemi në dispozicion na ndalojnë, aktualisht, që të përcaktojmë ndonjë veprim me rendësi penale, në ngarkim të disa prej personave të përmendur (SOTIRI ROMEO, PETO ZHAKLINA, XHABAFTI SOKOL dhe CUCI ENDI), duke qenë se nga aktet e hetimit nuk figuron asnjë element që t’i lërë vend ngritjes së akuzave në të ardhmen’…
Unë kam qenë në Itali për t’u kujdesur për nënën time të sëmurë gjatë vitit 2021, e cila fatkeqësisht ndërroi jetë në 3 maj 2021 në Itali. Në datën 4 maj 2021 im bir erdhi në Itali dhe së bashku u kthyem në Shqipëri për t’i bërë nënës nderimet e fundit.
Askush nuk ka të drejtë që për qëllime tërësisht politike të na linçojë dhe dënojë publikisht. Unë iu kërkoj vetëm të mos hidhni baltë mbi djalin tim, një i ri i sapodiplomuar që sapo ka filluar të ecë në jetë dhe ndryshe nga çfarë shpifet nga puseta dixhitale, punon prej shtatorit 2021 për EPO në Mynih, Gjermani (The European Patent Office-Zyra Europiane e Markave dhe Patentave). Faleminderit!
Top Channel
