“Odissea” e Christopher Nolan thyen rekorde në kinematë botërore, arkëton 259 milionë dollarë në tre ditë 

Superproduksioni, i bazuar në poemën epike të Homerit, është shndërruar në një fenomen global dhe ka vendosur standarde të reja teknike në industrinë e filmit.

Sipas të dhënave të para, filmi ka siguruar 120 milionë dollarë në Amerikën e Veriut, ndërsa 139 milionë dollarë të tjerë janë arkëtuar në 73 tregje ndërkombëtare. Në Itali, një nga tregjet kryesore evropiane, shitja e biletave në 72 orët e para ka kaluar 7.5 milionë euro.

“Odissea” është gjithashtu filmi i parë në historinë e kinemasë që është xhiruar tërësisht me kamera IMAX në film celuloid. Për realizimin e tij janë përdorur mbi 610 kilometra shirit filmik, duke synuar një cilësi vizuale sa më autentike dhe një përvojë unike për publikun.

Me një kast të njohur aktorësh dhe një prodhim në shkallë të gjerë, filmi sjell në ekran një nga veprat më të rëndësishme të letërsisë antike, duke e bërë historinë e Homerit të aksesueshme për një audiencë globale.

Suksesi i “Odissea” forcon edhe një herë reputacionin e Christopher Nolan si një nga regjisorët më të rëndësishëm të kinemasë bashkëkohore. Ai është i njohur për aftësinë për të kombinuar kinemanë artistike me spektaklin e filmave blockbuster, duke trajtuar tema si koha, kujtesa dhe psikologjia njerëzore.

Gjatë karrierës së tij, Nolan ka realizuar filma të suksesshëm si “Inception”, “Interstellar”, trilogjinë “The Dark Knight” dhe “Oppenheimer”, ky i fundit i siguroi dy çmime Oscar, përfshirë ato për Filmin më të Mirë dhe Regjisorin më të Mirë.

Një nga karakteristikat që e dallon regjisorin britanik është përkushtimi ndaj realizmit në ekran. Edhe në “Odissea”, ai ka shmangur përdorimin e tepruar të efekteve dixhitale, duke ndërtuar elementë fizikë realë, përfshirë anije luftarake në përmasa të plota, për t’i dhënë filmit një ndjesi sa më autentike.

Top Channel