Shkarkimet, surprizat e kabinetit dhe politikat: 24 orët e para të Andy Burnham si kryeministër i Britanisë

Ndër lëvizjet më të rëndësishme ishte emërimi i John Healey si kancelar, një vendim që erdhi si surprizë për politikën britanike.

Pak orë pasi shkarkoi disa aleatë të ish-kryeministrit Keir Starmer nga kabineti, Burnham emëroi Healey në postin e dytë më të rëndësishëm të qeverisë. Ish-sekretari i Mbrojtjes kishte dhënë dorëheqjen vetëm pesë javë më parë për shkak të mosmarrëveshjeve me Starmer lidhur me shpenzimet ushtarake.

BBC shkruan se në kabinetin e ri janë rikthyer edhe Wes Streeting si sekretar i Mbrojtjes dhe Miatta Fahnbulleh si sekretare e Energjisë, të dy figura që kishin pasur përplasje me qeverinë e mëparshme. Megjithatë, ata konsiderohen gjerësisht si politikanë me përvojë dhe të aftë për të drejtuar dikastere të rëndësishme.

Një nga vendimet e para të qeverisë së re ishte ulja e TVSH-së për faturat e energjisë, një masë që është mirëpritur edhe nga Partia Konservatore. Megjithatë, opozita ka ngritur pikëpyetje mbi mënyrën se si do të financohet kjo politikë.

Emërimi i Healey-t është pritur pozitivisht nga zyrtarë të lartë në Ministrinë e Mbrojtjes, të cilët besojnë se ai do të mbështesë rritjen e buxhetit për mbrojtjen. Nga ana tjetër, disa burime brenda ministrisë e kanë përshkruar atë si një drejtues kërkues dhe me stil të ashpër pune.

Në Partinë Laburiste, riorganizimi ka shkaktuar reagime të ndryshme. Sipas deputetëve laburistë, ministrat e shkarkuar ndahen në tre kategori: ata që kishin mosmarrëveshje politike me Burnham, ata që konsideroheshin joefektivë në detyrë dhe ata që nuk gëzonin mbështetje brenda grupit parlamentar.

Aleatja e Burnham, Anneliese Midgley, është ngarkuar me detyrën për të ruajtur unitetin e grupit parlamentar, ndërsa reagimet kritike të disa ish-ministrave tregojnë se jo të gjithë janë të kënaqur me ndryshimet.

Ndërkohë, në Westminster po shtohen spekulimet se Burnham mund të përfitojë nga një rritje e mundshme në sondazhe për të shpallur zgjedhje të parakohshme, me synimin për të siguruar një mandat të plotë për programin e tij qeverisës.

Lideri i Reform UK, Nigel Farage, ka kërkuar mbajtjen e zgjedhjeve të parakohshme, duke argumentuar se Burnham nuk ka një mandat të drejtpërdrejtë nga votuesit. Megjithatë, burime brenda Reform UK pranojnë se një skenar i tillë mund të mos i favorizojë, pasi partia po përballet me sfida të brendshme.

Edhe partitë e tjera opozitare kanë nisur përgatitjet për një skenar të mundshëm zgjedhor. Liberal Demokratët kanë konfirmuar se kanë filluar organizimin për një fushatë të mundshme.

Megjithëse Burnham nuk ka dhënë sinjale se synon të shpallë zgjedhje të parakohshme, analistët politikë vlerësojnë se ai përballet me një dilemë: të kërkojë një mandat të ri për reformat e tij ose të qeverisë në një periudhë që pritet të shoqërohet me vështirësi ekonomike dhe sfida politike.

Top Channel