Në Ardenicë të Lushnjës është gjetur një skelet njeriu, që dyshohet se mund të jetë i një ushtari italian të Luftës së Dytë Botërore.
Agim Hoxha ishte personi i cili gjatë punës në oborrin e shtëpisë së tij, në thellësinë 10 cm arriti të zbulojë skeletin. Menjëherë ka lajmëruar kryeplakun e fshatit e më pas policinë.
Edhe bashkëshortja e tij, Dhurata Hoxha thotë se ky është rasti i parë që kanë gjetur eshtra njerëzore. Ajo kërkon të bëhet një studim i zonës.
Kryetari i fshatit Myzafer Hoxha, dyshon se eshtrat mund të jenë të një ushtari italian të mbetur i vrarë gjatë Luftës së Dytë Botërore.
Ai thotë se në këto kodra ka qenë ndërtuar një spital ushtarak. Madje në këtë zonë me përpara janë zbuluar edhe enë qeramike, por asnjëherë nuk është bërë ndonjë studim.
Eshtrat e gjetura janë marrë nga policia, e cila i ka dërguar në laboratorin e mjekësisë ligjore për të zbuluar kujt i përkasin ato.
Top Channel
