Spanjë/ Rrugët kthehen në arenë përleshjesh gjatë protestave kundër masave të reja

01/11/2020 18:28

Rrugët në Spanjë u kthyen në një fushë beteje gjatë demonstratave që filluan ndaj masave të reja të marra kundër përhapjes së koronavirusit.

Protestat kundër masave të vendosura, të cilat filluan në Barcelonë në fillim të kësaj jave dhe shpejt u përhapën në qytete të tjera të mëdha, vazhduan të shtunën në mbrëmje në Madrid, Vitoria, Bilbao dhe Logrono.

Grupet u mblodhën përmes rrjeteve sociale, duke thënë: “Populli është lodhur, të dalim në rrugë”. Ata mbajtën një protestë në qendra të qyteteve për të cilën nuk morën leje.

Gjatë protestës, protestuesit sulmuan policinë me gurë dhe shkopinj, duke dëmtuar dyqanet dhe pronën publike në qendrat e qyteteve dhe duke u vënë flakën kontejnerëve të plehrave.

Në kryeqytetin Madrid, policia ndërhyri kundër protestuesve që u përpoqën të bllokonin Rrugën Granvia në qendër të qytetit.

Gjatë incidenteve, të cilat u kthyen në një luftë në rrugë, pati të lënduar, ndërsa policia arrestoi disa protestues.

“Sjellja e dhunshme dhe iracionale e grupeve të vogla nuk mund të tolerohet. Vetëm me përgjegjësi, unitet dhe sakrificë mund ta kapërcejmë epideminë që ka shkatërruar të gjitha vendet”, tha kryeministri spanjoll Pedro Sanchez.

Gjatë protestave në Barcelonë, ​​Burgos, Valencia dhe Santander të premten, 29 persona u arrestuan dhe një numër i madh u plagosën, përfshirë disa oficerë policie.

Spanja u godit më shumë sesa pritej nga vala e dytë e infeksionit me koronavirus dhe gjendja e jashtëzakonshme e futur më 25 tetor u zgjat deri më 9 maj. Për më tepër, Spanja ka futur masa shtesë, konkretisht kufizime të lëvizjes për 15 nga 17 provincat autonome.

Më shumë se gjashtë persona nuk mund të mblidhen në një vend për aq kohë sa zgjat kufizimi i lëvizjes i vendosur në vend nën gjendjen e jashtëzakonshme.

Top Channel