Interit i duhen edhe dhjetë pikë, ka një kalendar të favorshëm dhe Sudetto tashmë është shumë pranë 13/04 02:56
Plot 488 artistë japonezë të filmave të animuar nënshkruan një peticion në vitin 1994, kur “Mbreti Luan” i “Disney-t”, një nga filmat e tyre më të suksesshëm, u hodh në treg në të gjithë botën.
Arsyeja ishte për ngjashmërinë e stërmadhe që Simba i filmit amerikan kishte me “Kimban” japonez, një përrallë që fillimisht u krijua që në vitet ’50, në libra me figura, e që në vitet ’60 u përshtat si serial nga prodhuesit japonezë, e madje u transmetua edhe në SHBA, Kanada e vende të tjera perëndimore, mbi 50 vite më parë.
Artistët e “Disney-t” thanë se për Kimban dëgjuan vetëm pasi prodhimi i filmit të tyre kishte përfunduar, dhe se më përpara nuk e dinin çfarë ishte. Por kjo mbetet e vështirë për t’u besuar, pasi ngjashmëritë jo vetëm që janë shumë të mëdha, por artisti i “Mbretit Luan” ka jetuar në Japoni në vitet ’80, kur Tezuka, krijuesi i “Kimbas”, njihej si “Disney” i Japonisë, dhe seriali është ritransmetuar e ripunuar në ato vite.
Siç shihet nga fotot më poshtë, ngjashmëritë janë vërtet shumë të mëdha për t’u shpërfillur. Jo vetëm te vizatimet, personazhet, por edhe te detajet e ngjarjeve. Edhe pse historitë që zhvillohen janë ndryshe, ashtu si Simba, edhe Kimba shihte të atin t’i shfaqej në qiell dhe mes reve. Personazhet e tjera, që nga Skari i lig, hienat mendjelehta, majmuni i mençur, papagalli ndihmës, e deri te skena në humnerë, kanë ngjashmëri me versionet japoneze të viteve para se të prodhohej filmi amerikan.
“Mbreti Luan” është një nga ikonat e “Disney-t” dhe ka vendosur rekorde për fitime, si herën e parë, në vitin 1994, ashtu edhe tani me versionin e vitit 2019. Vetëm versioni i fundit i kaloi 1 miliardë dollarët në shitje biletash nga kinematë botërore, ndërsa versioni i parë mblodhi 968 milionë vetëm nga kinematë. Artistët japonezë kanë kërkuar që “Disney” të paktën ta pranojë frymëzimin nga versioni i tyre, pasi “Tezuka”, krijuesi i Kimbas, konsiderohet ikonë dhe pasuri kombëtare.
Top Channel
