Zidane: Me Juven, finalja jonë. S’ka Real pa Cristianon

Një ditë më parë, shumë bileta ishin ende të pashitura, ndërsa gazetarët dhe tifozët duken të pashqetësuar përballë një përmbysjeje, që matematikisht është ende e mundur nga bardhezinjtë.

Zizou është pyetur nga reporterët mbi një finale hipotetike me Barçën (që do t’i duhet gjithashtu të bëjë një ‘shëtitje’ në Romë), duke i përmendur se mbeten edhe 4 ndeshje nga Championsi i tretë radhazi.

Por tekniku francez duket sikur kërkon të ruajë qetësinë, edhe pse shfaqet qartësisht i tensionuar.

“Çfarë finale flisni? Finalja jonë luhet nesër dhe na duhet të bëjmë një ndeshje të madhe për të mundur Juventusin, e kësisoj të kalojmë edhe turin. Nuk dua të dëgjoj të tilla diskutime, as ne nuk e mendojmë finalen e Championsit. I marrim ndeshjet njëra pas tjetrës, e kaq na mjafton. Mjafton diçka e vogël për të hedhur dëm të gjithën. Shikoni La Ligën. Të premten ju thashë se duhej të fitonim për të kapur vendin e dytë, por tani jemi në vend të katërt. Sa i përket ndeshjes me Atleticon, luajtëm shumë mirë, por rrezikuam edhe të humbisnim. Kështu e ka futbolli. Tani për tani mendoj vetëm për Juven”, tha Zidane.

Kohët e fundit, ekipet italiane kanë pësuar humbje radhazi përballë skuadrave spanjolle.

“Nuk mendoj se është çështje e dobësisë së futbollit italian, por çështje e supremacisë së atij spanjoll. La Liga është një kampionat i fortë, më konkurrues, teksa edhe ekipi i renditur i fundit mund të të bëjë surpriza. Thjesht La Liga është më e fortë aktualisht”, shtoi francezi i Realit.

I pyetur për Ronaldon, ai theksoi se, gjithnjë sipas mendimit të tij, është e vështirë të imagjinosh Realin pa portugezin. “Për fat të mirë ai është lojtar i yni, e për këtë jemi të kënaqur. Shumë persona kujtojnë ende Di Stefanon, sikurse shumë persona do të kujtojnë gjatë Cristianon në të ardhmen”.

Top Channel