Kroaci, shpëtohen klandestinët; 67 emigrantë thuajse të asfiksuar

Ministri i brendshëm kroat, Vlaho Orepiç, tha se ishte evituar një tragjedi e ngjashme me atë të Austrisë, vitin e kaluar, falë ndërhyrjes në kohën e duhur.

“Falë zotit reaguam në kohë. 35 persona janë shtruar në spital për shkak të mungesës së oksigjenit, një pjesë e tyre në gjendje asfiksie. Policia në mënyrë urgjente kërkoi ndihmën mjekësore dhe këta njerëz u ndihmuan. Pas kurimit, ata do të kthehen nga kanë ardhur”.

Kamioni, me targa britanike, u ndalua gjatë një kontrolli rutinë të policisë. 42 emigrantë u dërguan menjëherë në spital, disa u trajtuan për helmim me monoksid karboni. Sipas ministrit kroat të shëndetësisë, mes të kuruarve në spital ishin dy djem të moshave 10 deri në 12 vjeç, ndërsa personat e tjerë ishin mes 15-20 vjeç.

Zyrtarët thanë se ata ishin gjetur në kushte të rënda, të dehidratuar dhe të paushqyer për ndoshta pesë ditë. Rreth 650 mijë vetë kaluan nëpërmjet Kroacisë nga shtatori 2015 deri në mars të këtij viti, nëpër të ashtuquajturën trajektore ballkanike, të shfrytëzuar nga emigrantët që vinin kryesisht nga Siria dhe i drejtoheshin Evropës perëndimore, veçanërisht Gjermanisë.

Trajektorja u mbyll në mars, pasi një numër vendesh të BE vendosën të blindonin kufijtë. Shumë emigrantë i janë drejtuar trafikantëve për t’i ndihmuar që të kalojnë ilegalisht kufijtë.

Policia austriake gjeti 71 emigrantë të vdekur, të mbyllur në një kamion frigoriferik në gusht të 2015 dhe shumë zyrtarë druajnë një tjetër katastrofë të ngjashme.

Top Channel