Nxehtësi rekord në Japoni, fund tetori por temperaturat kalojnë 30°C në Tokio dhe Osaka

Sipas Agjencisë Meteorologjike Japoneze, ky është regjistrimi më i vonë i një temperature të tillë në tetor për të dy qytetet.

Temperaturat e larta u regjistruan të hënën, duke thyer rekorde shumëvjeçare dhe duke tërhequr vëmendjen e meteorologëve. Në Tokio, ku të dhënat meteorologjike mbahen që nga viti 1875, një temperaturë mbi 30°C nuk ishte regjistruar kaq vonë në tetor. Rekordi i mëparshëm datonte më 19 tetor 2024.

Edhe në Osaka, qytetin e dytë më të madh të Japonisë, temperaturat kaluan 30°C. Rekordi i mëparshëm për këtë periudhë ishte vendosur më 20 tetor 1933, ndërsa regjistrimet meteorologjike në rajon datojnë që nga viti 1883.

Agjencia Meteorologjike Japoneze përdor termin “Manatsubi”, që përkthehet si “ditë vere”, për ditët kur temperaturat maksimale arrijnë ose kalojnë 30 gradë Celsius.

Regjistrimi i temperaturave kaq të larta në fund të tetorit është i pazakontë për klimën sezonale të këtyre qyteteve dhe vjen pas një vere me temperatura rekord në vend.

Sipas të dhënave meteorologjike të cituara në raportim, Japonia përjetoi në vitin 2025 verën më të nxehtë të regjistruar ndonjëherë.

Më 5 gusht 2025, temperatura arriti në 41.8°C në qytetin Isesaki, në veri të Tokios, duke shënuar një tjetër tregues të intensitetit të valëve të të nxehtit në vend.

Top Channel