Identifikohet organizatori i sulmeve në Paris e Bruksel

08/11/2016 00:00

Organizatori i sulmeve të Parisit dhe Brukselit është identifikuar. Me këtë pretendim e hap faqen e parë e përditshmja fraceze “Le Monde”, vetëm pak ditë para ceremonisë përkujtimore për masakrën e 13 nëntorit.

Sipas gazetës, hetuesit francezë dhe belgë e kanë një emër dhe ai është Oussama Atar, i njohur ndryshe si “Abou Ahmad”. Siç thuhet, xhihadisti 32-vjeçar nga Belgjika ka përcaktuar nga Siria objektivat e sulmeve, duke koordinuar dhe financuar celulat.

Ndërkohë, 5 persona që kanë lidhje me të ashtuquajturin Shtet Islamik u arrestuan gjatë operacioneve të koordinuara në Gjermani, përfshirë një prej rekrutuesve më të rëndësishëm të luftëtarëve për ISIS.

Në shënjestër të bastisjeve u vunë disa apartamente në Gjermaninë veriore e perëndimore dhe një xhami pranë Hannoverit. Mes personave të arrestuar është një irakian, i cili thirret me pseudonimin Abu Walaa, ose predikuesi pa fytyrë.

Televizioni gjerman “NDR” e ka identifikuar atë si Ahmad Abdelazziz A.

Bastisjet u kryen pas informacioneve të siguruara nga një xhihadist 22-vjeçar, i cili qëndroi disa muaj me Shtetin Islamik në Siri, para se të arratisej në Turqi. Në shtator, personi i identifikuar si Anil O. dha një intervistë, në të cilën iu referuar Abu Walaas si numri një i ISIS-it në Gjermani.

Pesë të arrestuarit dyshohen se rekrutonin xhihadistë dhe i ndihmonin ata në udhëtimin drejt zonës së konfliktit. Ata mohojnë çdo lidhje me terrorizmin.

Top Channel