Roli në Luftën e Dytë Botërore, debat në Hungari

Debati lindi pas propozimit të qeverisë për ngritjen e një monumenti përkujtimor të pushtimit gjerman të marsit të vitit 1944. Kritikët akuzojnë qeverinë se po përpiqet të rishkruajë historinë dhe të harrojë rolin e Hungarisë si një aleat i Gjermanisë naziste, si dhe rolin aktiv të saj në Holokaust.

Propozimi i qeverisë së kryeministrit Viktor Orban u bë publik vetëm një ditë pas caktimit të datës së zgjedhjeve parlamentare, të caktuara për më 6 prill duke rritur kritikat ndaj partisë në pushtet, FIDESZ se po inkurajon nacionalizmin në përpjekje për të ndaluar rrjedhjen e elektoratit të saj drejt partisë së ekstremit të djathtë, Jobbik.

Projekti-ideja e monumentit tregon një engjëll që sulmohet nga një shqiponjë e zezë. Engjëlli simbolizon Hungarinë dhe shqiponja e zezë Rajhun e Tretë.

Një grup prej 23 historianësh më në zë në vend kritikojnë projektin duke deklaruar se me këtë deformohet historia dhe merret parasysh vetëm viti i fundit i Luftës së Dytë Botërore, kur Hungaria e udhëhequr nga Miklos Horthy u përpoq të bënte paqe me forcat aleate, por u pushtua nga Gjermania para se ta arrinte një gjë të tillë.

Nga ana e saj, partia neo-naziste Jobbik mbështetën projekt-idenë, por thanë se vendi ku duhej të vendosej të ishte pikërisht në qendër të kryeqytetit, aty ku sot është një monument i epokës sovjetike, që sipa kësaj partie duhet të zhvendoset.

Miklos Horthy udhëhoqi Hungarinë nga vitit 1920 deri në vitin 1944. Gjatë sundimit të tij vendi u afrua me Gjermaninë naziste dhe që para se të niste Lufta e Dytë Botërore, Horthy kishte ndërmarrë disa operacione kundër popullsisë çifute në vend.

Top Channel