Gruaja i vrau tre fëmijët e tyre/ “Lëreni të paktën një të jetojë”, lutja e dëshpëruar e Patrick Clancy-t, falja për Lindsay-n dhe jeta pas tragjedisë

Në intervistën e tij, Clancy foli për orët e fundit që kaloi me fëmijët, përpjekjen dëshpëruese për të shpëtuar të paktën foshnjën Callan dhe mënyrën se si ka tentuar të rindërtojë jetën pas humbjes së tre fëmijëve.

Ngjarja ndodhi më 24 janar 2023, në shtëpinë e familjes në Duxbury. Patrick ishte larguar për pak kohë nga banesa për të kryer një punë dhe kur u kthye gjeti tre fëmijët në bodrum, ndërsa Lindsay ishte e plagosur në oborr pas një tentative për vetëvrasje.

Cora dhe Dawson nuk mundën të mbijetonin. Ndërsa Callan, vetëm tetë muajsh, u gjet ende gjallë dhe u transportua me helikopter në spital. Ai jetoi edhe katër ditë, ndërsa babai qëndroi pranë tij deri në momentet e fundit.

“Unë vërtet besoja se kishte një shans që Callan të jetonte”, rrëfeu Clancy. Në dëshpërim, ai kujtoi se mendimi i vetëm që i kalonte në mendje ishte: “Më lini vetëm një, vetëm një fëmijë.”

Ndërsa mbante Callan në njërën dorë, ai shkruante nekrologjitë për Cora dhe Dawson me dorën tjetër. Në fund, Callan vdiq në krahët e të atit.

Patrick Clancy ishte dëshmitari i parë në gjyqin e ish-gruas së tij dhe për dy ditë foli për përkeqësimin e gjendjes së saj pas lindjes së fëmijës së tretë.

Ai dëshmoi se Lindsay kishte qenë një nënë e përkushtuar dhe se i donte fëmijët e saj, por në muajt para tragjedisë kishte përjetuar stres të rëndë, ankth dhe probleme serioze të shëndetit mendor.

Sipas dëshmisë së tij, nga shtatori 2022 deri në janar 2023 ajo kishte marrë trajtime dhe medikamente të ndryshme, të përshkruara nga mjekë të ndryshëm.

Në një moment, Lindsay i kishte treguar bashkëshortit për mendimet e saj se diçka e keqe mund t’i ndodhte njërit prej fëmijëve. Megjithatë, Patrick tha se nuk besonte se ata ndodheshin në rrezik të menjëhershëm, pasi nuk kishte parë ndonjë qëllim të saj për t’i dëmtuar.

Kur u pyet nëse ndihej fajtor që nuk kishte mundur ta parandalonte tragjedinë, ai u përgjigj se kishte bërë “më të mirën që mundi me atë që dinte në atë kohë”.

Një prej pjesëve më të ndjeshme të intervistës ishte mënyra se si Patrick foli për Lindsay dhe vendimin e tij për ta falur.

Ai tha se ish-gruaja e tij nuk i kishte kërkuar falje apo nuk i kishte kërkuar që ta falte. Megjithatë, për të, falja ishte bërë pjesë e procesit për të vazhduar jetën.

Pas vdekjes së fëmijëve, Clancy kaloi një periudhë në të cilën nuk dëshironte të jetonte dhe ndiente se nuk kishte më një qëllim. Ndihma nga specialistët e shëndetit mendor e ndihmoi gradualisht të përballej me humbjen.

Ai tha se kishte frikë se, nëse nuk arrinte ta falte Lindsay-n, zemërimi dhe dhimbja do ta konsumonin përgjithmonë.
Më shumë se tre vjet pas tragjedisë, Patrick thotë se ende u flet çdo ditë tre fëmijëve të tij.

Kur gazetari e pyeti se çfarë u thotë, ai dha një përgjigje të shkurtër: “Më ndihmoni.”

Ai shpjegoi se dëshiron të besojë se fëmijët e tij ende e ndihmojnë në njëfarë mënyre dhe se ky komunikim është një mënyrë për të ruajtur lidhjen me ta.

Gjatë gjyqit u dëgjua edhe telefonata dramatike që Patrick i bëri shërbimeve të emergjencës natën e tragjedisë. Ai tregoi se, pak para se telefonata të dëgjohej në sallën e gjyqit, kishte përjetuar një sulm të fortë paniku.

Gjyqi ndaj Lindsay Clancy përfundoi më 4 shtator 2026, pasi juria nuk arriti një vendim unanim dhe gjykatësi shpalli një gjykim të pavlefshëm.

Mbrojtja e Lindsay argumentoi se ajo nuk ishte penalisht përgjegjëse për veprimet e saj për shkak të një gjendjeje të rëndë psikotike pas lindjes. Prokuroria, nga ana tjetër, argumentoi se ajo e dinte se çfarë po bënte dhe se vrasjet ishin të paramenduara.

Sipas juristëve që folën publikisht pas gjyqit, votimi përfundimtar ishte 11 me 1 në favor të shpalljes së saj të pafajshme për shkak të gjendjes mendore, por mungesa e unanimitetit bëri që gjykimi të përfundonte pa një verdikt.

Prokurori i Qarkut të Plymouth, Timothy Cruz, ende nuk ka njoftuar nëse do të kërkojë një gjyq të ri. Ndërkohë, avokatët e Lindsay kanë kërkuar që çështja të rrëzohet, duke iu referuar edhe argumenteve që lidhen me parimin e rrezikut të dyfishtë. Seanca e ardhshme është planifikuar për 29 shtator 2026.

Pas tragjedisë, Patrick u largua nga Massachusetts dhe u transferua në Nju Jork, duke shpresuar të jetonte larg vëmendjes publike.

Atje u njoh me Dr. Rachel Dennis, specialiste e mjekësisë riprodhuese. Të dy u takuan gjatë një vrapimi në Central Park dhe u martuan në prill të vitit 2026.

Dennis u shfaq edhe në intervistën e “60 Minutes”, duke e përshkruar Patrick si një baba të përkushtuar dhe partner mbështetës.

Çifti tani po përpiqet të ndërtojë një jetë të re dhe të krijojë familjen e tyre. Megjithatë, për Patrick, Cora, Dawson dhe Callan mbeten pjesë e pandashme e saj.

Ai tha se, nëse do të ketë fëmijë të tjerë, dëshiron që një ditë t’u tregojë atyre për tre vëllezërit dhe motrën e tyre që humbën jetën në tragjedinë e vitit 2023.

Top Channel