Skandali me alarmin e qumështit

Ishte kjo deklaratë e Autoritetit Kombëtar të Ushqimit, bazuar në dyshimet e Agjencisë së Ushqimit dhe Veterinarisë së Kosovës që përhapi alarmin lidhur me rrezikun e konsumimit të disa markave të qumështit të prodhuara në vend dhe atyre të importit.

Por kur ende nuk kemi një përgjigje të saktë lidhur me nivelin mbi normat e lejuara nga BE të Aflatoksinës në këto parti qumështi, ministri i Bujqësisë, Genc Rruli deklaron se cështja e Aflatoksinës është një luftë e pandershme tregtare.

“Duke kuptuar qartë se çështja e Aflatoksinës nuk lindi si një problem dhe përkujdesje ndaj mbrojtjes, shëndetit të konsumatorit, por si një luftë e pandershme tregtare mes vendeve të rajonit ne kemi për detyrim politik, por dhe profesional të mbrojmë nga goditje të tilla jo vetëm thjesht industrinë tonë moderne të përpunimit dhe të ambalazhimit të qumështit, por çka është më e rëndësishme të mbrojmë dhe interesat e jo më pak se 20 mijë fermerëve shqiptarë”, tha Ruli.

Ministri ka mbrojtur përfshirjen në këtë alarm, abuziv sipas tij, të Autoritetit Kombëtar të Ushqimit, duke thënë se reagimi i autoriteteve shqiptare ishte korrekt, pasi pala shqiptare nuk bëri mbrojtje të njëanshme të produktit vendas, në dëm të sigurisë së shëndetit të konsumatorëve.

Ndërsa ministri i Jashtëm Edmond Panariti shkoi dhe më tej duke e quajtur alarmin e autoriteteve kosovare thjesht spekulative dhe pengesë artificiale për qarkullimin e lirë të mallrave mes dy vendeve.

“Javën që vjen kam ndërmend që me ministrin Hoxhaj të nënshkruaj një protokoll të bashkëpunimit ekonomik me Republikën e Kosovës. Qëllimi është që ne të krijojmë hapësira sa më të mëdha të një tregu të përbashkët, ku te kemi qarkullim të lirë të mallrave, përfshirë këtu edhe produktet me origjinë shtazore, pa pengesa artificiale, siç ishte kjo pengesa e fundit, e cila ishte bërë thjesht për qëllime tregtare”, tha Panariti.

Këto deklarata u bënë gjatë një konference të organizuar me rastin e 85-vjetorit të krijimit të Shërbimit Veterinar Shqiptar.

Qumështi, Kosova nuk tërhiqet

“Superanaliza” e një prej produkteve shqiptare të qumështit, e kryer në laboratorin e çertifikuar ndërkombëtar, rezulton pozitive me aflatoksinë, ashtu siç konstatoi Agjencia Kosovare e Veterinës dhe Ushqimit para disa ditësh.

Në këtë mënyrë, ky institucion i kundërpërgjigjet akuzave  të fundit nga Tirana se vendimi për heqjen e disa markave të qumështit nga tregu ishte artificial dhe për çështje konkurrence.

“Ne tani po presim rezultatet që do vijnë nga superanaliza, që e ka vërtetuar dyshimin tonë për një prodhues nga Shqipëria. Këto rezultate do t’i bëjmë publike në media dhe do t’i heqim dyshimet se ne kemi ndikuar pozitivisht apo negativisht për balancimin e tregut”, deklaroi Lamir Thaçi, zëdhënës i Agjencisë së Veterinës dhe Ushqimit të Kosovës.

Por, edhe këtë herë zyrtarët e AVUK-ut nuk publikuan përqindjet e aflatoksinës në qumësht me arsyetimin se janë në pritje të analizave të tjera për t’i publikuar të gjitha në një ditë.

Sa i përket qumështit që prodhohet në Kosovë, agjencia nuk ka dërguar mostrat në laboratorin ndërkombëtar sepse analizat e bëra në Kosovë rezultojnë se përmbajtja e aflatoksinës në qumështin vendor është në nivelin e lejuar nga Bashkimi Europian.

Nga ana tjetër, zyrtarë të tjerë të qeverisë së Kosovës kanë refuzuar të komentojnë deklaratat e ministrit shqiptar të Bujqësisë dhe atij të Punëve të Jashtme. Kjo, për faktin se AVUK monitorohet nga zyra e kryeministrit dhe jo nga Ministria e Bujqësisë.

Top channel nuk ka mundur të kuptojë nëse vendimi i AVUK-ut është bërë në konsultim me autoritetet monitoruese. Kjo për faktin se zëvendëskryeministri, i cili ka pasur nën mbikëqyrje këtë mekanizëm, Bujar Bukoshi ka kohë që ka hequr dorë nga detyra për shkak të problemeve me drejtësinë, po kështu edhe stafi i tij.

Top Channel ka kontaktuar me ministrin e Bujqësisë Blerand Stavileci, por ai ka refuzuar të komentojë mbi këtë çështje me arsyetimin se AVUK nuk është nën ombrellën e ministrisë së tij.

Sidoqoftë, burime të tjera kanë shpjeguar se Stavileci ka zhvilluar një bisede telefonike me homologun shqiptar Genc Ruli për këtë çështje. Ndërkaq, është bërë e ditur se ministri Stavileci ka programuar këtë të hënë një takim me zyrtarët e agjencisë për të marrë më shumë informata.

Si u ngrit alarmi vetëm mbi dyshimet që hodhën specialistët kosovarë

Më 22 shkurt mbërriti nga Kosova informacioni se disa parti të disa markave të qumështit prodhim shqiptar rezultuan me nivel të aflatoksinës shumë më të lartë se norma e lejuar e Bashkimit Evropian.

Lajmi u publikua menjeherë në media, ndërkohë që ishte njoftuar Autoriteti Kombëtar i Ushqimit për bllokimin nga Kosova të një sasie qumështi.

Menjeherë pas kesaj Ministria e Bujqesise reagoi nëpërmjet një deklarate per shtyp, ku theksoi se bllokimet e bera nga AUV ne Kosove jane ende ne proces analizimi.Tre ditë më vone, Ministria e Bujqesise dhe AKU mblodhën mostra te qumeshtit, per t’i analizuar prane Institutit të Sigurise Ushqimore dhe Veterinare ne Tirane për të verifikuar rezultatet e Kosovës, ndonëse u hodhen dyshime se ne kete laborator nuk kishte reagente. Nje dite me pas drejtori i AKU-së del ne konference per shtyp, ku deklaron se pas analizave te bera ne Institutin e Sigurise Ushqimore dhe Veterinare ne Tirane, sasia e Aflatoksines ne qumesht rezultoi e njejte si ne Kosove, mbi normat e lejuara te BE-se.

Por ne asnje rast nuk u publikua niveli i aflatoksines dhe niveli se kur ajo përbënte rrezik për jetën e konsumatorit.Analizave iu nënshtruan vetëm markat e dyshuara në Kosovës dhe jo të gjithë llojet dhe as nënproduktet e qumështit. Mostrat e qumështit të këtyre markave u nisen per t’u analizuar ne laboratorine e akredituar ne Breshia te Italise.

Ndonese ne kushte dyshimi iu kerkua subjekteve, që në mënyre vullnetare të tërhiqnin nga tregu produktet e dyshuara, ndërsa një ditë më pas Ministria e Shëndetësisë nëpërmjet një urdhëresë ndaloi konsumin e qumështit ne çerdhe dhe kopshte. Këto alarme bënë që konsumatorët të braktisnin përdorimin e këtyre markave të qumështit, ndërsa pasojat mbërritën jo vetëm në fabrikat e përpunimit, por edhe në fermat blegtorale, ku qumështi mbeti stok.

Sipërmarrësit deklaruan se kjo bëhet për arsye konkurrence dhe se autoritetet nuk duhet të japin alarme pa patur në dorë prova që tregojnë dëmin në shëndetin e konsumatorit.

Ende pa përgjigjet e analizave nga Italia, Ministria e Bujqësisë nxorri disa ekspertë për të qetësuar tregun, të cilën thanë se qumështi nuk është i dëmshëm. Sipas tyre, sasia e Aflatoksinës në të është më e lartë se standardet e Bashkimit Europian, por është shumë larg nivelit që përbën rrezik për shëndetin. Madje u tha se niveli i Aflatoksines eshte i njejte ne te gjitha llojet e qumeshtit qe prodhohet ne Ballkan, pra mbi nivelin e lejuar të Bashkimit Europian dhe se SHBA e ka normën e lejuar 10 herë më të lartë.

Top Channel