Incidente shoqëruan ndeshjen e Europa League midis Lacios dhe Borusias së Mynshengladbahut, mbrëmjen e së enjtes, pasi pesë tifozë gjermanë u plagosën me thikë në pjesë të ndryshme të Romës.
Ultrasit e klubit italian, të njohur për prirjet e tyre neonaziste dhe vandaliste, ishin përgjegjësit e këtyre sulmeve.
Të njëjtët tifozë u bënë protagonistë negativë edhe për sulmin ndaj tifozëve të Totenhamit në ndeshjet e grupit, kur disa anglezë u dhunuan brenda një bari, ndërsa dy prej tyre rrezikuan jetën pas plagëve me thikë.
Sulmi i parë mbi mbështetësit e Mynshengladbahut ndodhi në sheshin e njohur të kryeqytetit italian, “Piazza di Spagna”, kur tre tifozë gjermanë u qëlluan me thikë. Ata u shoqëruan në një spital, ku janë jashtë rrezikut për jetën.
Një tifoz 50-vjeçar i gjermanëve u sulmua në një zonë tjetër qëndrore të kryeqytetit, ndërsa i njëjti agresion u përsërit ndaj një tjetër tifozi, në dalje të hotelit ku po qëndronte.
Policia ka nisur një hetim zyrtar, ndërsa UEFA u shpreh se do të presë përfundimet e policisë, përpara se sa të vendosë nëse do të marrë edhe ajo masa disiplinore ndaj Lacios.
Pas barazimit 3-3 në ndeshjen e parë, klubi ku Igli Tare është drejtor sportiv, arriti të fitonte në “Olimpico” me rezultatin 2-0, duke siguruar kualifikimin për 1/8-tat e Europa League.
Top Channel
