Plani i shkurtimeve, Peugeot kundër Hollande

Presidenti Thierry Peugeot, në një intervistë për të përditshmen “Le Figaro”, vlerësoi se kritikat për largimin nga puna të 8 mijë punonjësve janë duke minuar besimin e investitorëve, në një kohë jo të lehtë për ekonominë botërore dhe vetë sektorin e automobilëve.

Më parë gjatë javës, presidenti Francois Hollande denoncoi planin si të papranueshëm, ndërsa kritikoi ashpër strategjinë e korporatës.

Disa ministra në fuqi kritikuan familjen Peugeot, duke vlerësuar se shkurtimet nuk po bëhen për të rritur rendimentin e firmës, por për të mbajtur të paprekur fitimet e tyre në mënyrë abuzive.

”Peugeot-Citroen” është korporata e dytë më e madhe europiane e prodhimit të automobilëve dhe anëtarët e familjes kontrollojnë 25,2% të aksioneve dhe 37,9% të votave.

Në një deklaratë, zoti Peugeot theksoi: “Jemi të gatshëm të pranojmë kritika, por gjithçka ka një kufi. Sulmi qeveritar mbi kompaninë ka një efekt të menjëhershëm në perceptimin e investitorëve dhe kjo është një situatë e rrezikshme. Ne jemi të vetëdijshëm për seriozitetin e planit tonë dhe nuk e kemi të lehtë të shkurtojmë 8 mijë punëtorë. Këto masa janë të dhimbshme dhe e kuptojmë që mund të krijojnë shok në kompani, qeveri dhe në të gjithë Francën, por ju garantoj se masat merren vetëm me qëllim që të bëjnë më të fuqishme themelet e Peugeot”.

Top Channel