“Më larguan disa zjarrfikës nga ndërtesa shumë afër vendit”, Trump tregon historinë për sulmet e 11 shtatorit: Menduam se ndërtesa do binte mbi ne

Presidenti amerikan, i lindur në New York, ishte në Manhattan ditën kur Kullat Binjake u shembën pasi u goditën nga dy aeroplanë të rrëmbyer nga xhihadistët e al-Kaedës. Këtë vit, presidenti republikan nuk do të marrë pjesë në ceremoninë tradicionale në vendin ku dikur ndodheshin kullat e Qendrës Botërore të Tregtisë, ku pritet të jenë të pranishëm të gjithë paraardhësit e tij, George W. Bush, Bill Clinton, Barack Obama dhe Joe Biden. Por ai do të mbajë një fjalim në Pentagon, një nga vendet e tjera të goditura 25 vjet më parë.

Rrëfimi i tij i fundit ngriti menjëherë pyetje në lidhje me vlefshmërinë e tij.

Gjatë një ceremonie të mbajtur pranë Shtëpisë së Bardhë për të shënuar përkujtimet e 11 shtatorit, Donald Trump tha: “Ne mblidhemi këtu për të riafirmuar premtimin e shenjtë të bërë një çerek shekulli më parë: nuk do ta harrojmë kurrë.”

Trump: “We will never forget the immortal heroes of September 11th, 2001.” pic.twitter.com/IRNKzT7Y5M

— The Post Millennial (@TPostMillennial) September 8, 2026

Siç bën shpesh, ai devijoi nga nderimi i gati 3,000 viktimave të sulmeve për të treguar një histori që e paraqiste atë si protagonist.

“Isha duke ndërtuar një ndërtesë të madhe në Nju Jork dhe e çova të gjithë ekipin atje sapo ndodhi”, tha presidenti.

Ai pretendoi se kishte qëndruar pranë një rrokaqielli, United States Steel Building, e cila “po dridhej dhe menduam se do të binte mbi ne”.

“Dy zjarrfikës, djem të mëdhenj dhe të fuqishëm më kapën për krahu dhe më thanë: ‘Duhet të largoheni që këtej’”, vazhdoi Trump.

“Ata më ngritën dhe filluan të vraponin”, tha ai, duke shtuar se ndërtesa në fjalë nuk u shemb.

Presidenti amerikan gjithashtu iu referua në fjalimin e tij të martën njërit prej heronjve të 11 shtatorit, Wells Crowther, i cili punoi në njërën nga Kullat Binjake dhe ndihmoi në shpëtimin e jetës së shumë njerëzve duke marrë pjesë në operacionet e evakuimit.

I riu, i njohur si “burri me shami të kuqe”, nga shamia që i kishte mbuluar gojën, u vra atë ditë.

“Burri me shami të kuqe. Ai u bë më i famshëm se unë. Nuk më pëlqen kjo. Nuk më pëlqen aspak”, tha Trump, duke qeshur.

Top Channel