Clive Palmer, një nga personat më të pasur të Australisë, do të ndërtojë një tjetër Titanik. Miliarderi bëri të ditur për mediat australiane se ndërtimi i anijes do të fillojë në fund të vitit 2013 dhe do të jetë gati për lundrim në vitin 2016.
Plani është që mjeti lundrues të jetë sa më i ngjashëm të jetë e mundur me Titanikun, por sigurisht që do të ketë teknologjinë moderne.
“Kam nënshkruar një memorandum me kompaninë shtetërore kineze CSC Jinling Shipyard për ndërtimin e një Titaniku të dytë”, theksoi Palmer.
“Do të jetë luksoz si Titaniku original, por me teknologjinë e shekullit XXI dhe me sisteme sigurie nga më të rejat”, shtoi miliarderi australian.
Anija parashikohet që do të lundrojë nga Londra në Nju Jork nëse gjithçka shkon sipas planit.
Kur u pyet nëse Titaniku 2 do të ketë fatin e paraardhësit të tij, Palmer tha: “Është dezinjuar që të mos mbytet, por asnjëherë nuk i dihet se çfarë ndodh nëse të gjithë do të ishim supersticiozë si ju gazetarët.”
Nuk është bërë e ditur kostoja e ndërtimit të kësaj anijeje.
Titaniku u mbyt më 15 prill të vitit 1912 duke shkaktuar më shumë se 1500 viktima.
Top Channel
