Libi, autokolona e armatosur hyn në Niger
06/09/2011 09:00
Forcat izraelite bombardojnë Libanin, raportohet për dhjetëra të vdekur e të plagosur 24/11 22:56
Një autokolonë me persona të armatosur nga Libia ka kaluar në Niger. Makinat, të cilat dyshohet se transportonin luftëtarë tuaregë të rekrutuar nga lideri libian Muammar Gaddafi për të luftuar për regjimin e tij, hynë në qytetin Agadez.
Ende nuk është e qartë nëse ndonjë nga familjarët e Gaddafi-t ndodhej në autokolone, ndërkohë që zëdhënësi i tij ka deklaruar se koloneli ndodhet ende në Libi.
Gaddafi ka bërë thirrje për të luftuar deri në vdekje, edhe pse regjimi i tij ka humbur kontrollin e pjesës më të madhe të vendit.
Autokolona e armatosur kaloi kufirin e Nigerit dhe mbërriti në Agadez vonë gjatë ditës së hënë, kanë bërë të ditur burime ushtarake perëndimore.
Burimet thanë se autokolona përbëhej nga 200 deri në 250 makina, të cilat shoqëroheshin nga ushtria e Nigerit.
Gjithësesi, një banor lokal, të cilit i referohet agjencia “Associated Press”, ka deklaruar se autokolona përbëhej nga më shumë se një duzinë kamionësh që mbanin trupa libiane të armatosura deri në dhëmbë.
Libia, NATO: Suksesi shumë pranë
Suksesi i misionit ushtarak të NATO-s në Libi është shumë pranë, por mandati i Aleancës nuk ka përfunduar ende.
Deklarata është bërë nga sekretari i përgjithshëm, Anders Fogh Rasmussen.
Ndërkohë, Saadi Gaddafi, i biri i kolonelit, ka konfirmuar se ka hapur negociatat me kreun ushtarak të rebelëve për të shmangur gjakderdhjen.
Top Channel
