Zërat me peshë në Evropë deklarojnë se një tjetër evropian duhet të marrë drejtimin e FMN-së, pas dorëheqjes së Dominiques Strauss Kahn.
Kancelarja gjermane Angela Merkel dhe presidenti i KE, Jose Manuel Barroso kanë qenë të parët që kanë reaguar pas debateve nëse kreu i ri i Fondit duhet të vijë nga një vend i zhvilluar.
Merkel ka deklaruar se zgjedhja e një evropiani është e nevojshme për të zgjidhur problemet ekonomike të eurozonës.
“Sigurisht që vendet në zhvillim kanë të drejtën e tyre për të zënë vendin e kreut të FMN-së apo Bankës Botërore. Por mendoj se në situatën aktuale, me problemet serioze që ka euro, do të ishte më i favorshëm një kandidat evropian”, ka pohuar Merkel.
Ndërsa një zëdhënëse e zotit Barroso citohet të ketë thënë se, është e natyrshme që shtetet anëtare të BE-së, si vendet me kontributin më të madh tek Fondi, të bien dakord për një kandidat të fuqishëm dhe konkurrues që mund të sigurojë mbështetjen e anëtarëve të FMN-së.
Aktualisht, kandidatët më të përfolur për zëvendësimin e Dominique Strauss Kahn janë:
Mohamed El-Erian, Egjipt
Stanley Fischer, Izrael
Gordon Brown, Britani
Kemal Dervis, Turqi
Peer Steinbrueck, Gjermani
Montek Singh Ahluwalia, Indi
Christine Lagarde, Francë
Agustin Carstens, Meksikë
Trevor Manuel, Afrikë e Jugut
Axel Weber, Gjermani
Top Channel