Seul, politika valutore dominon G20-ën

Druhet se takimi i vendeve të grupimit G20 në Seul mund të degradojë në një përleshje verbale mes SHBA dhe Kinës për të ashtuquajturën “lufta e valutave” dhe cakuilibrimin e tregtisë.

Para takimit presidenti amerikan Barack Obama u bëri thirrje liderëve të tjerë që të punojnë së bashku për rimëkëmbjen e ekonomisë globale.

Gjithashtu, ai ka mbrojtur politikën e Shteteve të Bashkuara për injektimin e 600 miliardë dollarëve në ekonominë amerikane.

“Me një mënyrë të kujdesshme dhe të qëndrueshme, ne duam të sigurohemi që po nxisim ritmet e rritjes si në vendin tonë, ashtu edhe jashtë”, ka pohuar Obama.

Obama ka sqaruar se politika e njoftuar javën e kaluar ka si qëllim gjallërimin e ekonomisë së brishtë amerikane.

Ndërkohë, sot, pak para nisjes së samitit, SHBA dhe Koreja e Jugut kanë njoftuar se nuk kanë arritur të nënshkruajnë një marrëveshje për tregtinë e lirë.

Top Channel