Vëzhgimi i Fiks fare/ Liqeni i Fierzës drejt katastrofës ekologjike

Mbeturinat vinë bashkë me prurjet hidrike që sjell Drini i Bardhë nga Kosova dhe Drini i Zi nga Maqedonia. Gazetarët e Fiks Fare udhëtuan drejt Kukësit e Tropojës për të vëzhguar nga afër situatën problematike e cila rrezikon të kthehet në katastrofë ekologjike.

Pjesa më e madhe e Liqenit që ndryshe njihet edhe si Liqeni i Kukësit nga banorët e qytetit me po të njëjtin emër, shtrihet në territorin e Shqipërisë dhe një pjesë e vogël në Kosovë. Por ndotja e vazhdueshme e viteve të fundit tashmë ka dëmtuar jo vetëm turizmin në zone, por edhe faunën e liqenit, ndaj përfaqësuesit e Bashkisë së Kukësit nuk reshtin së kërkuari dhënien e statusit të veçantë për këtë liqen në mënyrë që të minimizohet ndotja.

Bujar Muçmata, sekretar i përgjithshëm i Bashkisë Kukës u shpreh se problemi i mbetjeve është një problem që vjen kryesisht nga ndotjet matanë kufirit dhe veç aksioneve të pastrimit nuk ka kapacitete te tjera për të ndërhyrë. Bashkia e Kukësit në bashkëpunim me Ministrinë e Mjedisit të Shqipërisë dhe Kosovës, po planifikon një takim ku pritet të dakordohet për një projekt të qëndrueshëm për minimizimin e problemit që tashmë është me përmasa rajonale.

“Aktualisht liqeni është pronë e korporatës elektroenergjitike shqiptare si menaxhuesi kryesor i ujëmbledhësit më të madh në vend, ndaj duhet të ketë edhe përgjegjësinë për mirëmbajtjen e këtij baseni ujëmbledhës. Por problemi nuk mund të quhet i zgjidhur nëse nuk merren masa nga përtej kufirit siç është pala kosovare që është ndotësi më i madh i Fierzës”, u shpreh përfaqësuesi i Bashkisë Kukës.

Ndërkohë që ngriti zërin edhe për kërkesën e vazhdueshme nga ana e institucionit që përfaqëson, për një mjet lundrues vetëpastrues i cili do të minimizonte problemin e ndotjes. Gjatë vitit të kaluar drejtoria e Përgjithshme e Emergjencave Civili shpalli situatë emergjente mjedisore në liqen dhe krahas preventivit për shpenzimet që kalon 2.5 milion lekë, Bashkia e Kukësit nuk mori asnjë qindarkë sipas zotit Muçmata.

Edhe në Tropojë ndotja ka qenë një problem i kahershëm. Janë 5 lumenj që bashkohen në lumin e Valbonës dhe bashkë me prurjet hidrike vijnë edhe mbetjet e ndryshme që kanë lënë shenja anës shtratit të lumenjve. Sipas shefit të shërbimeve publike Pal Rosaj, shenjat e mbeturinave anës shtratit të Valbonës arrijnë 2.5 m lartësi. Kjo ndotje ka ndodhur midis harkut kohor 2010- 2011, vite kur ka qenë edhe përmbytja e madhe.

“Territori është i vështirë për t’u pastruar, do mjete, forca dhe burime financiare. Ne kemi biseduar me disa organizata dhe me Ministrinë e Mjedisit dhe na është premtuar që do na ndihmojnë” pohon z.Rosaj.

Por, deri në mbajtjen e premtimeve dhe ndërgjegjësimit të gjithë faktorëve, liqeni i Fierzës do të vazhdojë të jetë i ndotur.

Top Channel