Drejtori i Mercedesit, Toto Wolff, ka reaguar ashpër ndaj teorive që qarkullojnë në rrjetet sociale, sipas të cilave ekipi gjerman po favorizon Kimi Antonellin në dëm të George Russell.
Wolff i ka cilësuar këto pretendime si absurde, duke theksuar se Mercedes nuk ka asnjë arsye për të favorizuar njërin pilot ndaj tjetrit, veçanërisht në një sezon ku ekipi lufton për titullin e konstruktorëve.
“Është plotësisht absurde. Kush e mendon këtë është idiot. Kjo na ka ndodhur edhe në të kaluarën me tifozët e Lewis Hamilton. Sinqerisht, nuk e kuptoj se çfarë po ndodh. A mendojnë njerëzit se kam një buton ku shkruhet: ‘George, dështim i menjëhershëm i motorit’?”, deklaroi Wolff.
Ai nënvizoi se Mercedes ka ruajtur gjithmonë parimin e trajtimit të barabartë të pilotëve, duke u ofruar të njëjtën mbështetje teknike dhe të njëjtat mundësi.
“Pse do ta vendosnim njërin pilot në disavantazh ndaj tjetrit, kur po luftojmë për kampionatin e konstruktorëve? Ne kemi pasur gjithmonë filozofinë e ofrimit të të njëjtit material për të dy pilotët”, shtoi drejtuesi austriak.
Kreu i Mercedesit kritikoi gjithashtu mënyrën se si përdoren rrjetet sociale, duke theksuar se shumë persona përhapin teori dhe akuza pa pasur prova.
“Mendoj se ky është drejtimi që po marrin sot mediat sociale. Njerëzit fshihen pas një ekrani dhe lëshojnë pe. Ka shumë polarizim dhe ndonjëherë lexoj çfarë shkruajnë. Më duket qesharake”, u shpreh ai.
Wolff shtoi se nuk i shqetësojnë as fyerjet personale dhe as komentet negative ndaj ekipit, por e konsideron të papranueshme shpikjen e historive për të krijuar polemika.
“Kam zero mirëkuptim dhe respekt për njerëzit që sajojnë këto histori. Në vend që të shikojnë Formula 1, duhet të shikojnë Teletubbies ose Mickey Mouse”, përfundoi Wolff.
Top Channel
