Championship, gjithnjë e më shumë hollivudian, Hugh Jackman në bisedime për blerjen e Norwich 03/09 23:28
Skema e ngjyrave
Madhësia e shkrimit
Lufta për pushtet në futbollin botëror ka hyrë në një fazë të re. FIFA ka kundërsulmuar publikisht dhe ligjërisht UEFA-n, duke e akuzuar për një “fushatë njollosjeje” ndaj presidentit Gianni Infantino, në lidhje me projektin e dështuar për përfshirjen e investitorëve privatë në të drejtat komerciale të Kupës së Botës.
Në dokumentet e paraqitura në Shtetet e Bashkuara, FIFA i cilëson kërkesat e UEFA-s për dokumente dhe dëshmi si një “fishing expedition”, duke pretenduar se ato kanë më shumë karakter mediatik sesa juridik. Në qendër të konfliktit është projekti FIFA Forward Enterprise, përmes të cilit FIFA kishte shqyrtuar mundësinë e ndarjes së aktiviteteve tregtare dhe shitjes së rreth 20 për qind të njësisë te investitorë privatë. Marrëveshja, që lidhej me një vlerësim prej rreth 20 miliardë dollarësh, u ndërpre pas reagimeve të forta.
UEFA, megjithatë, nuk është tërhequr. Konfederata europiane ka kërkuar në disa shtete amerikane dokumente dhe dëshmi nga FIFA dhe palët e tjera të përfshira, me synimin për t’i përdorur ato në një procedurë të mundshme penale në Zvicër.
Në dokumentet e saj, UEFA ka ngritur akuza të rënda ndaj mënyrës se si është negociuar projekti, duke pretenduar se vlerësimi i të drejtave është bërë në mënyrë jo transparente dhe pa një proces të pavarur konkurrues. FIFA i ka hedhur poshtë këto pretendime dhe argumenton se UEFA po përdor gjykatat dhe mediat për të dëmtuar reputacionin e Infantinos dhe drejtimit të organizatës.
Sipas FIFA-s, pas gjithë kësaj përplasjeje fshihen edhe interesa ekonomike dhe një betejë më e gjerë për balancën e pushtetit në futbollin botëror. Për momentin, asnjë nga akuzat nuk është provuar përfundimisht në gjykatë. Por përplasja FIFA-UEFA tashmë është kthyer në një betejë të hapur juridike dhe politike, ndërsa dokumentet e kërkuara në SHBA mund të përcaktojnë hapin e ardhshëm të kësaj lufte.
Top Channel
