“Rrezik për gratë shtatzëna”/ Publikohen mesazhet e Faucit, çfarë shkruante ai për vaksinën Covid-19

Senatorët republikanë Ron Johnson dhe Rand Paul publikuan të hënën një pjesë të komunikimeve, pasi Departamenti Amerikan i Shëndetësisë dhe Shërbimeve Njerëzore i dorëzoi telefonin e Fauci-t një nënkomiteti të Senatit që po heton veprimtarinë e tij.

Sipas senatorëve, telefoni përmbante më shumë se 34 mijë mesazhe dhe 522 mesazhe zanore. Deri tani janë publikuar vetëm 11 mesazhe, të dërguara gjatë kohës kur Fauci drejtonte Institutin Kombëtar për Alergjitë dhe Sëmundjet Infektive (NIAID).

Çfarë shkruante Fauci për vaksinën dhe shtatzëninë?

Në një komunikim të datës 25 janar 2021, Vivek Murthy, i cili në atë kohë ishte pjesë e bordit këshillues të presidentit Joe Biden për Covid-19, e pyeti Fauci-n nëse ekzistonte ndonjë rrezik potencial për gratë shtatzëna dhe nëse kishte të dhëna që tregonin nëse vaksinimi në fillim apo në fund të shtatzënisë ishte më i përshtatshëm.

Fauci iu përgjigj se nuk kishte “asnjë të dhënë apo arsye teorike” për të besuar se vaksinimi në fillim të shtatzënisë ishte më i mirë se vaksinimi më vonë.

Më tej, ai ngriti një shqetësim teorik lidhur me temperaturën dhe reagimin inflamator pas dozës së dytë të vaksinës, duke thënë se kjo, teorikisht, mund të lidhej me abortin spontan gjatë tremujorit të parë.

Drejtoresha e atëhershme e CDC-së, Rochelle Ëalensky, iu përgjigj se ishte një pikë e rëndësishme, veçanërisht pas dozës së dytë.

Një ditë më vonë, sipas mesazheve të publikuara, Fauci shkroi se çdo vaksinë për të cilën kishte të dhëna të kufizuara gjatë shtatzënisë duhej vlerësuar me kujdes dhe se duhej peshuar rreziku i mundshëm kundrejt përfitimeve.

Ai theksoi gjithashtu se infektimi me Covid-19 mund të ishte veçanërisht serioz gjatë shtatzënisë.

Në atë periudhë, gratë shtatzëna nuk ishin përfshirë në provat fillestare të vaksinave. Megjithatë, Fauci shkroi se më shumë se 10 mijë gra shtatzëna ishin vaksinuar që nga autorizimi i përdorimit emergjent dhe se deri në atë moment nuk ishin shfaqur probleme.

Çfarë ndodhi më pas?

Në gusht 2021, CDC rekomandoi zyrtarisht vaksinimin kundër Covid-19 për gratë shtatzëna, pasi analizoi të dhënat dhe nuk gjeti rritje të rrezikut për abort spontan apo shqetësime të tjera të sigurisë të lidhura me vaksinën.

Studimet e publikuara më pas kanë arritur në përfundimin se vaksinat kundër Covid-19 janë të sigurta gjatë shtatzënisë, ndërsa reagimet serioze negative janë të rralla.

Ndërkohë, senatorët Ron Johnson dhe Rand Paul kanë bërë të ditur se stafet e tyre po shqyrtojnë pjesën tjetër të të dhënave të telefonit të Fauci-t dhe se synojnë t’i publikojnë ato në vijim.

Përplasja politike me Faucin

Publikimi i mesazheve vjen në një kohë kur përplasja politike mes Fauci-t dhe republikanëve në Kongres është intensifikuar.

Rand Paul, kryetar i Komitetit të Senatit për Sigurinë Kombëtare dhe Çështjet Qeveritare, ka qenë prej kohësh një nga kritikët më të ashpër të Fauci-t. Republikanët e akuzojnë ish-zyrtarin e lartë shëndetësor për fshehje të informacionit mbi origjinën e pandemisë dhe për keqinterpretim të të dhënave gjatë menaxhimit të krizës, megjithëse deri tani nuk kanë paraqitur prova të qarta për një mbulim të tillë.

Javën e kaluar, senatorët republikanë të nënkomitetit votuan për ta mbajtur Fauci-n në përbuzje të Kongresit, pasi ai përdori më shumë se 100 herë Amendamentin e Pestë gjatë një seance dëgjimore, duke refuzuar t’u përgjigjej pyetjeve me argumentin se përgjigjet e tij mund të përdoreshin për ndjekje penale.

Demokratët e kanë cilësuar hetimin si pjesë të një fushate politike kundër Fauci-t dhe kanë akuzuar republikanët se po përpiqen të zhvendosin përgjegjësinë për kritikat ndaj menaxhimit të pandemisë.

Pak ditë më parë, komiteti publikoi gjithashtu më shumë se 1,100 faqe nga ditari personal i Fauci-t, që mbulon periudhën 2019-2022.

Top Channel