Me medaljen e argjendtë të nënkampionit të botës në qafë dhe me sytë e mbushur me lot, Lionel Messi përjetoi një nga momentet më emocionuese të karrierës së tij.
Në fushën e “New York New Jersey Stadium”, pas humbjes 1-0 ndaj Spanjës në finalen e Kupës së Botës 2026, kapiteni argjentinas u dorëzua përballë emocioneve.
I rrethuar nga shokët e skuadrës dhe mijëra tifozë që e brohorisnin nga tribunat, Messi nuk arriti t’i fshehë lotët. Ai shikoi përreth stadiumit, sikur po përpiqej të përjetësonte atë moment, ndërsa për shumë tifozë ishte një skenë që mund të shënojë fundin e një historie të jashtëzakonshme me fanellën e Argjentinës.
Një përshëndetje që ngjante me lamtumirë
Pas ceremonisë së medaljeve, tifozët argjentinas nisën këngët për kapitenin e tyre. “La Pulga”, me fytyrën e rënduar dhe lotët që i rridhnin në faqe, u përshëndet me ta në një nga skenat më të fuqishme emocionale të këtij Botërori.
Në Buenos Aires, dhimbja ishte po aq e madhe. Qindra tifozë të mbledhur në “Plaza Seeber” për të ndjekur finalen u larguan në heshtje pas golit të Spanjës në kohën shtesë, me lot në sy dhe me ndjesinë se një kapitull historik mund të kishte përfunduar.
Fundi i një cikli të jashtëzakonshëm
Në moshën 39-vjeçare, Messi luajti finalen e tij të tretë të Kupës së Botës. Pas humbjes me Gjermaninë në 2014 dhe triumfit historik ndaj Francës në 2022, finalja kundër Spanjës mund të ketë qenë vallëzimi i fundit i tij në skenën më të madhe të futbollit.
Por trashëgimia e tij me Argjentinën është e paprekshme.
Messi largohet nga Botërorët me rekorde historike:
6 pjesëmarrje në Kupën e Botës (2006, 2010, 2014, 2018, 2022, 2026), rekord i përbashkët historik.
34 ndeshje në Botëror, më shumë se çdo futbollist tjetër.
21 gola në Botëror, rekord absolut.
12 asiste në Botëror, gjithashtu rekord.
33 kontribute direkte në gola në historinë e turneut.
I vetmi lojtar që ka shënuar në të gjitha fazat e një Botërori: grupe, 1/8 finale, çerekfinale, gjysmëfinale dhe finale (2022).
Dy herë fitues i Topit të Artë të Botërorit (2014, 2022).
Një histori dashurie me Argjentinën
Për 20 vite, Messi mbajti mbi supe peshën e një kombi të tërë. Pas shumë zhgënjimesh, kritikash dhe finalesh të humbura, ai arriti më në fund të ngrejë Kupën e Botës në Katar 2022 dhe të fitojë zemrat e tifozëve argjentinas përgjithmonë.
Me fanellën e kombëtares ai mbyll një kapitull me:
125 gola në 206 ndeshje.
Rekordin si golashënuesi më i mirë i Argjentinës.
Kupën e Botës 2022.
Dy Copa América (2021, 2024).
Finalissima 2022.
Lotët që tregojnë peshën e një historie
Messi ka qarë edhe më parë në momente të mëdha: pas humbjes së finales së Botërorit 2014, pas triumfit në Copa América 2021 dhe pas sfidave të tjera emocionale me kombëtaren. Por lotët e East Rutherford kishin një tjetër kuptim.
Kliko këtu të shohësh videon e Messit duke qarë
Ishte një moment ku një kampion 39-vjeçar, me 8 Topa të Artë dhe me një karrierë që ka ndryshuar historinë e futbollit, ndoshta po përshëndeste për herë të fundit fanellën që e bëri simbol të një kombi.
Top Channel
