“Dekretimi i Ols Dados prokuror pa asnjë relacion arsyetues”, zbardhet procesverbali i seancës në Administrative. Veliaj: Po nëse propozohej ‘Gomari i Babatasit’, do emërohej?

Në transkriptin e seancës, kryebashkiaku Veliaj dhe avokati i tij mbrojtës, Plarent Ndreca, argumentojnë se si Dado është emëruar në kundërshtim me kriteret ligjore, pas pasur Shkollën e Magjistraturës.

Në fjalën e tij, Veliaj është shprehur se si ai është ndoshta i vetmi njeri në Republikën e Shqipërisë që është kallëzuar nga një person që nuk ekziston, e që sipas tij ka një diferencë shumë e madhe nga një kallëzim anonim. Ai thotë se kjo që ka ndodhur është një kurth dhe një intrigë e paprecedentë.

“Nesti Angoni kallëzon në korrik 2023, sapo ka mbaruar numërimi në KQZ dhe çështja regjistrohet pas 7 muajsh, kur afati është 15-ditor. Dhe thashë: ka diçka që nuk shkon këtu. Nuk mund t’i duhen 7 muaj për të siguruar diçka që ligji e parashikon për 15 ditë. Nuk është vetëm procedimi im. Ka shumë gjëra në këtë proces që më bënë të mendoj se kjo është dora e një njeriu jo profesionist. Ky është një person që ka marrë një porosi për të bërë këtë. Por kjo nuk përfaqëson SPAK-un, nuk përfaqëson reformën në drejtësi. Ka njerëz që bëjnë një punë të shkëlqyer dhe që ndoten nga dikush që në mënyrë të përsëritur shkel këto elemente”, ka thënë Veliaj në seancë.

Gjithashtu, ai është shprehur se një arsye tjetër që e shtyu që ta bënte këtë kërkesëpadi ndaj Prokurorit Dado ishte edhe fakti se atij i është bërë një vetting 20 vjeçar.

“Kam dëgjuar edhe politikanë të tjerë që thonë “më është hetuar e gjithë jeta”, por zakonisht u është hetuar jeta politike. Mua më është hetuar jeta që nga viti 2004, kur isha te “Mjaft”, me kë kam udhëtuar, etj. Pra, jam i vetmi njeri që i është hetuar jeta që nga momenti që kam marrë diplomën e universitetit”, ka thënë Veliaj.

Veliaj përmend edhe faktin se Ols Dado i ka kërkuar disa herë të ndërhyjë për një leje ndërtimi të një pallati në Rrugën e Kavajës. “Dhe ajo që më “kërcet” më shumë është konflikti i interesit. Kjo është arsyeja finale që më shtyu këtu. Nga telefoni i prokurorisë më është kërkuar disa herë që të ndërhyj për një leje ndërtimi në rrugën e Kavajës. Pra, kemi një konflikt të hapur interesi. I kam thënë:

“Ti merr kaq leje, por kullat i jep KKT, jo bashkia”. Bashkia funksionon me një formulë të qartë ligjore. Madje drejtues të bashkisë më kanë thënë: “Ky zotëri nuk është prokuror, por ndërmjetës”, sepse kërkonte leje edhe për të tjerë. Kjo ishte pika që mbushi kupën”, është shprehur Veliaj.

Një nga elementët më interesantë që vërehet në transkriptin e seancës është arsyetimi që jep përfaqësuesi i Presidentit të Republikës, lidhur me procedurat e emërimit të Ols Dados prokuror. Sipas përfaqësuesit të Presidentit, nga praktika e arkivuar që nga viti 2008 rezulton se ekziston vetëm një propozim i ardhur nga Prokurori i Përgjithshëm i asaj kohe (Ina Rama), një shkresë përcjellëse dhe menjëherë pas kësaj, dekretin e nxjerrë nga Presidenti i Republikës në atë kohë. Presidenca ka arsyetuar se kjo praktikë nuk mund të konsiderohet e plotë nëse mungon një relacion apo një shpjegim i mëtejshëm se si është arritur në vlerësimin e këtyre kandidaturave, i cili duhet të kryhet nga Këshilli i Prokurorisë.

“Ne nuk jemi të qartë se si Presidenti e ka shprehur vullnetin e tij nëpërmjet këtij dekreti dhe si është arritur deri në këtë pikë. Gjithashtu, nuk jemi të qartë nëse kjo është një praktikë e plotë. Pra, a ka akte të mëtejshme? A ka dokumente që mund të ndodhen pranë Prokurorisë dhe që ne nuk i kemi në arkivën tonë? Sepse neve nuk na rezulton asgjë tjetër përveç këtyre. Në këtë kuptim, ne nuk mbajmë dot një qëndrim lidhur me rrëzimin, por do ta lëmë në vlerësim të gjykatës, sepse realisht, me kaq pak sa kemi këtu, nuk arrijmë të themi se si është shprehur vullneti i Presidentit në atë kohë”, është shprehur Presidenca në atë seancë.

Ndërsa, pyetjes së gjyqtarit të seancës se “a do ta dekretonte Presidenti me kaq dokumentacion sot një propozim të tillë”, Përfaqësuesi i Presidentit është përgjigjur: “Sot, jo. Në atë kohë nuk e dimë nëse ka qenë i mjaftueshëm ose jo. Për mendimin tim, duhet të kishte pasur një relacion arsyetues”.

Transkripti i seancës në Gjykatën Administrative:

Plarent Ndreca: Nuk mund të bëhesh prokuror pa autorizim ligjor. Pra, i gjithë thelbi i pyetjes në këtë gjykim është: a është Olsi Dado prokuror i Republikës së Shqipërisë apo jo? Dhe unë mendoj se kjo është sfida juaj, i nderuar gjyqtar, që ne ju kemi ftuar ta zgjidhni dhe ta thoni jo vetëm për ne si palë, por edhe për shkak të interesit të lartë publik dhe cilësisë së posaçme që ka Erion Veliaj, si kryetar i Bashkisë i zgjedhur tre herë radhazi në mënyrë demokratike. Kjo është një sfidë për ju dhe për vetë sistemin: a ka barazi para ligjit edhe për prokurorët, apo ekziston një standard i ndryshëm për ta?

Ndreca: Dhe nëse më lejoni, doja ta parashtroja pergjigjen në formën e një pyetjeje – natyrisht retorike, pasi ju do të keni gjithë kohën për të dhënë përgjigjen me vendimin tuaj. Pyetja që ju ngritët ishte: a varej procedimi penal nga ky akt administrativ? Pyetja ime është: a do të kishte procedim penal nëse ky akt administrativ nuk do të ekzistonte? Pra, sigurisht që është një pyetje retorike, e lidhur drejtpërdrejt me argumentin. A do të kishim sot persona të arrestuar mbi bazën e akteve të firmosura nga një Prokuror i Republikës, nëse ky akt administrativ nuk do të ekzistonte – ashtu sikurse, në fakt, juridikisht nuk ekziston? Sepse zoti Dado nuk është prokuror i Republikës së Shqipërisë. Sado të lodhemi ne në këtë diskutim – dhe më lejoni për mënyrën se si po e shtroj – Olsi Dado nuk bëhet prokuror i Republikës së Shqipërisë përveçse nëse pala e paditur sjell prova se ai ka përmbushur kriteret ligjore. Ne, nëse do të silleshin prova të tilla, jo vetëm që do ta pranonim, por madje do të kërkonim edhe ndjesë për këtë proces që kemi nisur. Por, pa u provuar përmbushja e këtyre kritereve sipas ligjit, Olsi Dado nuk bëhet prokuror i Republikës së Shqipërisë. Dhe, për rrjedhojë, pyetja mbetet: a do të kishte sot një procedim penal? A do të ishte arrestuar sot kryetari në detyrë i Bashkisë së Tiranës, nëse ky akt administrativ nuk do të ekzistonte juridikisht? Kjo është arsyeja pse ne legjitimohemi të mbrojmë një interes të drejtpërdrejtë – jo vetëm Erion Veliaj si individ, por, mbi të gjitha, Erion Veliaj si kryetar i Bashkisë. Sepse më e rëndësishmja është që qytetarët e Tiranës, të cilët e kanë votuar tre herë radhazi, kanë një interes të ligjshëm të dinë: a është arrestuar Erion Veliaj nga një prokuror i Republikës së Shqipërisë, apo nga një individ që ushtron funksione publike pa bazë ligjore, duke prodhuar pasoja kaq të rënda sa privimi i lirisë në mënyrë të paligjshme? Kjo është një pyetje që meriton përgjigje. E meriton Erion Veliaj, e meriton Bashkia e Tiranës dhe e meritojnë qytetarët – jo vetëm të Tiranës, por të gjithë Republikës së Shqipërisë. Sepse besoj se biem dakord që Erion Veliaj nuk është thjesht një politikan lokal, por një figurë me peshë kombëtare. Për rrjedhojë, ekziston një interes i ligjshëm që ju, i nderuar gjyqtar, ta vlerësoni këtë çështje dhe ne kemi besimin se do ta vlerësoni drejt: se ky akt nuk ka ekzistuar kurrë juridikisht dhe se, fatkeqësisht, ka prodhuar pasoja të rënda – jo vetëm për familjen dhe personin e Erion Veliajt, por edhe për qytetin e Tiranës në tërësi. Për pasojat nuk dua të zgjatem në këtë moment, pasi besoj se do t’i trajtojmë më gjerësisht në vijim.

Veliaj: Patjetër, i nderuar, dhe ju falënderoj shumë për mundësinë. Dua ta theksoj se unë nuk jam këtu për mëshirë, as për historinë time personale, dramën e familjes sime, të fëmijëve të mi apo të nënës sime. Kjo është një çështje krejt tjetër, çfarë më është shkaktuar mua si individ, dhe për këtë foli avokati. Tani dua të fokusohem tek ajo që i është shkaktuar Bashkisë së Tiranës dhe pse jam investuar personalisht për t’i kërkuar kësaj gjykate një vendimmarrje. Kanë ndodhur disa episode shumë të çuditshme, që devijojnë tërësisht nga një sjellje e rregullt, sipas mendimit tim.
Unë vërtet jam profan – nuk kam mbaruar juridikun, por prej rreth 14 muajsh lexoj materiale pa ndërprerje – dhe kur shoh sesi njerëz që nuk kanë mbaruar as magjistraturën po arrestojnë të tjerë, mendoj se kam të drejtë të them edhe unë “dy paret e mia” për këtë histori. Sot jam ndoshta i vetmi njeri në Republikën e Shqipërisë që jam kallëzuar nga një person që nuk ekziston. Kjo është një diferencë shumë e madhe nga një kallëzim anonim. Një kallëzim anonim, sipas ligjit për sinjalizuesit (“bilbilfryrësit”), ka një mbrojtje të posaçme: personi ekziston, identiteti i tij është i njohur për autoritetet dhe ai gëzon mbrojtje si anonim. Ndërsa në rastin tim, personi nuk ekziston fare. Nëse unë kam sot një kallëzim të rremë, nuk di kë të kallëzoj. “Nesti Angoni” nuk ekziston. Kjo është gjëja e parë që më habit.

Gjyqtari: Dakord, por edhe gjykata e ka për detyrë ta fokusojë procesin në atë lëndë që po gjykon.

Veliaj: Keni absolutisht të drejtë dhe nuk do t’ju kërkoj kurrë që të bëni vlerësim mbi rrethanat e çështjes time. Po them vetëm cilat ishin indiciet për mua që më shtynë të kërkoj diçka këtu. Pra, po ju citoj një listë gjërash të pazakonshme në sjelljen e një prokurori në Republikën e Shqipërisë, që janë unike vetëm për rastin tim. Pra, vetëm për rastin tim fillon një procedim nga një kallëzim anonim, pra një kallëzim “fake”, nga një njeri që nuk ekziston fare, ndërkohë që unë jam kallëzuar për inceneratorët. Dje fitova gjyqin për shpifje me atë italianin që ishte paguar nga një televizion; kishte marrë një premtim pagese dhe doli në gjykatë dhe tha: “Unë kam gënjyer, kam mashtruar, nuk e njoh fare Erion Veliajn, nuk e kam takuar asnjëherë, nuk ka lidhje fare me inceneratorët, nuk njoh as dhe as këto çudirat e tjera.” Pra, ajo që unë kam frikë se ka ndodhur është që ky është një kurth dhe një intrigë e paprecedentë. Ky është material për Netflix dhe kur shikon që të denoncon një njeri që nuk ekziston fare, pra nuk ka një palë të dëmtuar. Kë ka dëmtuar Erion Veliaj në punën e vet? Me pemët që mbolli, me 50 shkollat që bëri, me 101 çerdhet që ndërtoi? Pra, nëse kam dëmtuar, në fakt është e kundërta. Jo për përfitime personale, por i kam marrë bizneset prej “veshi” dhe u kam thënë: “Ti do bësh këtë çerdhe, ti do bësh këtë kopsht, ti do bësh këtë pistë, ti do rregullosh këtë…”. Pra ishte shumë e habitshme sesi diçka që…

Veliaj: Ajo që më ngacmoi të bëja këtë padi nuk është vetëm kjo e njeriut që nuk ekziston, pra e një pale që nuk është dëmtuar, sepse nuk ekziston. Është edhe fakti sesi pashë për herë të parë – dhe është i vetmi rast në të gjithë prokurorët e Shqipërisë, nga sa kam studiuar në këto 14 muaj – që afati dyjavor për të regjistruar një procedim, pra nuk respektohet për 7 muaj. Pra, Nesti Angoni kallëzon në korrik 2023, sapo ka mbaruar numërimi në KQZ dhe çështja regjistrohet pas 7 muajsh, kur afati është 15-ditor. Dhe thashë: ka diçka që nuk shkon këtu. Nuk mund t’i duhen 7 muaj për të siguruar diçka që ligji e parashikon për 15 ditë. Edhe diçka tjetër. Nuk është vetëm procedimi im. Ka shumë gjëra në këtë proces që më bënë të mendoj se kjo është dora e një njeriu jo profesionist. Ky është një person që ka marrë një porosi për të bërë këtë. Por kjo nuk përfaqëson SPAK-un, nuk përfaqëson reformën në drejtësi. Ka njerëz që bëjnë një punë të shkëlqyer dhe që ndoten nga dikush që në mënyrë të përsëritur shkel këto elemente. Çfarë më shtyu tjetër? Përveç shkeljes së afateve, nga kallëzimi në korrik te regjistrimi në shkurt, dhe më pas edhe një vit tjetër për regjistrimin e emrit të Erion Veliajt – një sjellje që nuk e kam parë në asnjë prokuror tjetër në 20 vitet e mia në administratë. Një tjetër element ishte një lloj “vettingu” 20-vjeçar i jetës sime. Kam dëgjuar edhe politikanë të tjerë që thonë “më është hetuar e gjithë jeta”, por zakonisht u është hetuar jeta politike. Mua më është hetuar jeta që nga viti 2004, kur isha te “Mjaft”, me kë kam udhëtuar, etj. Thuhet “udhëtim me charter”, por ato janë avionë me qindra vetë nga agjencitë e pushimeve Sava Tours, ku nuk di kush është në bord. Mund të kem qenë me këdo. Pra jam i vetmi njeri që i është hetuar jeta që nga momenti që kam marrë diplomën e universitetit.

Gjyqtari: Mirë, tani le të shkojmë te objekti i padisë.

Veliaj: Dhe ajo që më “kërcet” më shumë është konflikti i interesit. Kjo është arsyeja finale që më shtyu këtu. Nga telefoni i prokurorisë më është kërkuar disa herë që të ndërhyj për një leje ndërtimi në rrugën e Kavajës. Pra kemi një konflikt të hapur interesi. I kam thënë: “Ti merr kaq leje, por kullat i jep KKT, jo bashkia”. Bashkia funksionon me një formulë të qartë ligjore. Madje drejtues të bashkisë më kanë thënë: “Ky zotëri nuk është prokuror, por ndërmjetës”, sepse kërkonte leje edhe për të tjerë. Kjo ishte pika që mbushi kupën.

Gjyqtari: Për termat pexhorativë është mirë t’i shmangim.

Veliaj: Absolutisht. Po citoja deklarime të bëra nga drejtues të bashkisë. Në këtë moment, kur bashkon një kallëzim nga një person që nuk ekziston, një “vetting” të jetës që nga fëmijëria dhe një konflikt interesi, them: këtu ka diçka që nuk shkon. Nëse një kuzhinier bëhet pilot, a hipën njeri në avion? Sot jemi në një situatë ku duhet vlerësuar nëse vendosja e njerëzve në detyra pa plotësuar kriteret shkakton pasoja të rënda. Dhe këto pasoja nuk janë vetëm për mua, por për Bashkinë e Tiranës.

Gjyqtari: Po, te bashkia.

Veliaj: Buxheti i bashkisë është realizuar vetëm 20%. Nuk firmos më njeri. Klima e frikës është totale. Në 10 vite bashkia ka ardhur vetëm në rritje, ndërsa këtë vit ka rënie drastike. Nuk hapen kopshte, nuk përfundojnë shkolla. Dreka në shkolla për 170 mijë fëmijë nuk u realizua sepse askush nuk firmos. Pra kemi pasoja reale për qytetin: pastrimi, arsimi, shërbimet. Për këto arsye kërkoj nga gjykata një vlerësim të drejtë dhe informacion të plotë. Nuk mund të kemi përgjigje formale nga institucionet për një çështje kaq serioze.

Gjyqtari: Mirë, i japim fjalën Presidentit të Republikës së Shqipërisë.

Përfaqësuesi i Presidentit: Faleminderit i nderuar.

Gjyqtari: More qëndrime me shkrim.

Përfaqësuesi i Presidentit: Jo nuk jemi njohur ende.

Gjyqtari: Nuk i ke marrë, atëherë me prapësimet e palës së paditur Ols Dado dhe prapësimet e këshillit të lartë të prokurorisë.

Përfaqësuesi i Presidentit: I nderuar, faleminderit. Atëherë, është e vërtetë që kemi të bëjmë me një vendimmarrje të Presidentit të Republikës të vitit 2008, në të cilën dukshëm janë ushtruar kompetencat kushtetuese dhe ligjore nëpërmjet një dekreti për emërim dhe transferim të prokurorit nga z. Bamir Topi në atë kohë. Ajo çfarë më bën përshtypje është se avokati përmend nenet 17 dhe 18. Mirëpo, nëse i referohemi ligjit nr. 8737 dhe shkojmë më tej, për shembull te neni 20 apo neni 21, duket qartë që ky është një proces që, në atë kohë, iniciohej nga Prokurori i Përgjithshëm, i cili merrte edhe mendimet e Këshillit të Prokurorisë, përpara se ky propozim t’i kalonte Presidentit të Republikës.
Megjithatë, ky është një qëndrim që ne nuk mund ta shtjellojmë plotësisht, pasi nga praktika e arkivuar që nga viti 2008 rezulton se kemi vetëm një propozim të ardhur nga Prokurori i Përgjithshëm, një shkresë përcjellëse dhe menjëherë pas kësaj, dekretin e nxjerrë nga Presidenti i Republikës në atë kohë. Ne mendojmë se kjo nuk mund të ishte finalizuar në këtë mënyrë, pra praktika nuk mund të konsiderohet e plotë nëse mungon një relacion apo një shpjegim i mëtejshëm se si është arritur në vlerësimin e këtyre kandidaturave, i cili në fakt kryhet nga Këshilli i Prokurorisë.
Sepse jemi njohur me kërkesë-paditë dhe gjatë gjithë kohës flitet për aktin administrativ, por në asnjë moment nuk sqarohet pjesa që ky është një proces që iniciohet nga Prokurori i Përgjithshëm dhe supozohet se duhet të ishte ezauruar më parë faza e vlerësimit të kandidaturave. Rasti i z. Dado duhej të ishte shqyrtuar fillimisht nga Këshilli i Prokurorisë dhe nga Prokurori i Përgjithshëm. Presidenti është hapi i fundit procedural në këtë zinxhir. Ne nuk jemi të qartë se si Presidenti e ka shprehur vullnetin e tij nëpërmjet këtij dekreti dhe si është arritur deri në këtë pikë. Gjithashtu, nuk jemi të qartë nëse kjo është një praktikë e plotë. Pra, a ka akte të mëtejshme? A ka dokumente që mund të ndodhen pranë Prokurorisë dhe që ne nuk i kemi në arkivën tonë? Sepse neve nuk na rezulton asgjë tjetër përveç këtyre. Në këtë kuptim, ne nuk mbajmë dot një qëndrim lidhur me rrëzimin, por do ta lëmë në vlerësim të gjykatës, sepse realisht, me kaq pak sa kemi këtu, nuk arrijmë të themi se si është shprehur vullneti i Presidentit në atë kohë. Ne jemi përpara faktit: është një dekret për emërim dhe transferim prokurori, i cili vjen menjëherë pas propozimit të Prokurorit të Përgjithshëm. Ne nuk dimë më tepër se si është arritur deri në atë pikë…

Gjyqtari: Po akti që kundërshtohet është i Presidentit.

Përfaqësuesi i Presidentit: Jam shumë dakord, por çështja është si është arritur deri te ai akt. Sepse sot, për shembull, kur na vijnë propozime nga Ministria e Mbrojtjes, ne bazohemi në një relacion, ka një arsyetim të strukturuar. Ndërsa këtu, kaq kemi në arkivë. Kjo është ideja.

Gjyqtari: Si organ, duke qenë se je njohur me një padi të tillë, duhet të komunikosh me institucionin përkatës që ka qenë në procedurë. Mund ta merrje informacionin dhe ta verifikoje vetë, nëse do të vlerësoje që akti është absolutisht i pavlefshëm. Tani po ia kërkon gjykatës?

Përfaqësuesi i Presidentit: Jo, ne thjesht po e lëmë në vlerësimin tuaj këtë çështje. Kjo është e gjitha.

Gjyqtari: Një qëndrim duhet ta mbash nëse akti është ose jo i pavlefshëm.

Përfaqësuesi i Presidentit: Proceduralisht, ne nuk mendojmë që akti është i pavlefshëm. Presidenti, në atë kohë, ka ushtruar kompetencat e tij kushtetuese dhe ligjore. Megjithatë, nuk dimë se si ka funksionuar pjesa e vlerësimit nga ana e Prokurorit të Përgjithshëm për kandidaturat. Sepse kriteret për kandidaturat nuk i takojnë Presidentit të Republikës; Presidenti nuk merret me procesin e vlerësimit. Supozohet që ky proces të jetë ezauruar nga Prokurori i Përgjithshëm dhe nga Këshilli i Prokurorisë. E parashikon vetë neni 21: me propozimin e Prokurorit të Përgjithshëm, pasi ky i fundit merr mendimin e Këshillit të Prokurorisë, bëhet propozimi te Presidenti dhe ai vendos “po” ose “jo”.

Gjyqtari: I ka pasur Presidenti këto, kur e ka nxjerrë aktin? Propozimin dhe mendimin e Këshillit të Prokurorisë?

Përfaqësuesi i Presidentit: Kaq ka pasur Presidenti; kaq rezulton nga arkiva. Një shkresë përcjellëse që përmban vetëm propozimin.

Gjyqtari: Çfarë akti tjetër do të duhej?

Përfaqësuesi i Presidentit: Ne nuk e dimë se si… Atëherë, duke qenë se ajo që kundërshtohet është mospërmbushja e kritereve nga z. Dado, themi që nuk dimë se si është arritur apo si është vlerësuar ky proces. Nuk e bën Presidenti këtë. Kjo është ideja.

Gjyqtari: Mirë. Për kushtet formale të padisë ke për të thënë ndonjë gjë?

Përfaqësuesi i Presidentit: Jo, i nderuar.

Gjyqtari: Jo.

Ndreca: Për një sqarim formal.

Gjyqtari: Po.

Ndreca: Për të qenë të qartë edhe ne. Pra, ju konfirmoni – dhe kjo është shumë e rëndësishme – sepse kam bërë një kërkesë drejtuar institucionit tuaj…

Përfaqësuesi i Presidentit: Dhe ju është kthyer përgjigje.

Ndreca: Po, shumë faleminderit. Dhe vetëm për ta sqaruar në vijim të debatit: ju konfirmoni që, përveç dekretit të lëshuar, ka vetëm një propozim, që është ky?

Përfaqësuesi i Presidentit: Po, është ky.

Ndreca: Pra nuk ka asnjë proces…

Përfaqësuesi i Presidentit: Nuk ka asnjë akt tjetër, sepse edhe për ne ky është një proces i ri, që i përket vitit 2008.

Ndreca: Po, e kuptoj që është rishtazi, patjetër.
Përfaqësuesi i Presidentit: Në arkivë gjenden vetëm këto akte.

Ndreca: Pra, në institucionin e Presidentit ka vetëm një propozim, pa asnjë dokumentacion shqyrtues nga Këshilli i Prokurorisë, pa një mendim të Prokurorit të…

Përfaqësuesi i Presidentit: Pikërisht këtë sapo po thoja.

Ndreca: E kuptova, prandaj po e bëja edhe pyetjen, sepse kam shumë interes të dëgjoj një përgjigje të saktë për këtë çështje. Pra, nuk ka në institucionin e Presidentit asnjë mendim të Prokurorit të Përgjithshëm, as CV, as historik.

Veliaj: Avokati pyeti për Erionin, por unë po pyes për Kryetarin e Bashkisë, meqë kam punuar me vite dhe e di që për të çuar një vendim në Këshillin Bashkiak duhet një relacion, duhen dokumente, duhen dëgjesa në komisione. Pra, ju po më thoni që në këtë emërim nuk ka asgjë tjetër përveç një letre ku Prokurorja e Përgjithshme, Ina Rama, thotë që filani të bëhet prokuror. Këtë po thoni?

Përfaqësuesi i Presidentit: Ekziston vetëm ky propozim nëpërmjet shkresës përcjellëse, i cili më pas shoqërohet me dekretin përkatës. Pra, në arkivën tonë nuk disponojmë një relacion të arsyetuar lidhur me kandidatët e propozuar.

Veliaj: Pa relacion, pa vendim të Këshillit të Prokurorisë?

Veliaj: Teorikisht, për të cituar një vepër të njohur, nëse Prokuroria e Përgjithshme do të kishte thënë të emëronim “Gomarin e Babatasit”, ju do të kishit ndryshuar dekret? Teorikisht po flas, pra a bëhet një verifikim?

Gjyqtari: Mund të përdorësh një paralele më…

Veliaj: Është një vepër që e dua fort.

Ndreca: Është folklorike.

Veliaj: …(nuk kuptohet). Pra, nëse do të vinte një propozim i tillë, institucioni nuk bën asnjë verifikim? Pra apriori e merr dhe e dekreton?
Përfaqësuesi i Presidentit: Kjo pyetje i referohet vitit 2026 apo vitit 2008? Sepse nëse flasim për veprimtarinë e institucionit sot…

Veliaj: 2008.

Gjyqtari: Pra, po e thjeshtojmë, po e bëjmë më konkrete…
Përfaqësuesi i Presidentit: I nderuar, duhet të kishte një relacion shoqërues, të cilin ne nuk e kemi.

Gjyqtari: Nëse do të ishte dikush tjetër, me një profesion që nuk ka lidhje me fushën juridike, me kaq dokumentacion, do ta dekretonte Presidenti?

Përfaqësuesi i Presidentit: Sot, jo. Në atë kohë nuk e dimë nëse ka qenë i mjaftueshëm ose jo. Për mendimin tim, duhet të kishte pasur një relacion arsyetues.

Veliaj: Faleminderit, kaq kisha.

Top Channel