Një 18-vjeçar shqiptar është dënuar me më shumë se tre vite burg pasi u dënua për vepra posedim dhe shpërndarje kanabisi në Suffolk dhe Merseyside.
Nadir Elezaj, u paraqit në Gjykatën e Kurorës së Liverpoolit të premten, më 25 prill, ku u dënua me një total prej 39 muajsh burgim në një Institucion për të Rinj.
Elezaj më parë kishte pranuar fajësinë për katër vepra penale të kryera në Suffolk: përfshirje në furnizimin me kanabis, posedim kanabisi me qëllim furnizimi, posedim i një dokumenti të falsifikuar dhe posedim i pasurisë kriminale, përkatësisht cash me vlerë 2,260 £.
Ai u dënua gjithashtu për dy vepra penale në Merseyside: prodhim kanabisi dhe vjedhje të energjisë elektrike.
Ai u dënua me 12 muaj burgim për veprat penale në Suffolk dhe burgim prej 27 muajsh për veprat penale në Merseyside te cilat adoleshenti shqiptar do t’i vuajë njëra pas tjetrës, duke e çuar dënimin e tij total në 39 muaj.
Më 19 maj 2024, oficerët e Sentinel South ishin në detyrë në Ipswich kur pikasën Elezajn duke hipur në një biçikletë në London Road. Ndërsa i afroheshin, ai u largua me shpejtësi, duke u ngjitur në trotuare dhe duke u kthyer nga njëra anë e rrugës në tjetrën. Pastaj ai zbriti me biçikletë në shtegun përgjatë lumit.
Oficerët e Sentinel kërkuan ndihmë dhe efektivë të tjerë u pozicionuan në Princes Street, por kur Elezaj pa policinë, ai la biçikletën dhe iku duke vrapuar.
Një nga oficerët e ndoqi, Elezaj u arrestua dhe u kontrollua për posedim droge. Policia i gjeti të riut shqiptar një numër qesesh me kanabis që i kishte hedhur në shkurre.
Elezaj dha emrin e tij dhe pretendoi se kishte mbërritur në Ipswich një ditë më parë, duke deklaruar se nuk jetonte aty. Ai refuzoi të jepte kodin PIN për telefonin e tij.
Oficerët ishin në dijeni të rasteve të tjera ku personat e arrestuar për furnizim me kanabis blinin biçikleta, ndaj policia bëri hetime në një shitës me pakicë në zonë rreth shitjeve të fundit dhe oficerëve iu dha një adresë në Wherstead Road.
Qiradhënësi u dha leje oficerëve për të kontrolluar ambientet ku jetonte adoleshenti dhe në papafingo u gjet një portofol që mbante kartën e identitetit të Elezajt, së bashku me një patentë shoferi rumune të falsifikuar që tregonte foton e tij, por me një emër tjetër.
162 qese kanabisi u gjetën nën shtrat. Dhoma e ndenjes kishte gjithashtu një shtrat ku u gjetën 139 qese kanabisi, si dhe një total prej mbi 2,220 £ cash.
Vlera totale e kanabisit të sekuestruar në vendin e arrestimit dhe në banesën ku u gjet portofoli i Elezajt ishte rreth 12,500 £.
Kur u mor në pyetje, Elezaj mohoi përfshirjen e tij në shitjen e drogës dhe përgjigjja e tij ndaj pyetjeve ishte: pa koment.
Ai u lirua nga policia, me kusht që të banonte në akomodimin e tij për të rinj në Kent dhe të paraqitej rregullisht në stacionin lokal të policisë.
Analiza e telefonit të Elezajt dha prova të mëtejshme për përfshirjen e tij në furnizimin me kanabis, gjurmët e gishtërinjve të tij u gjetën në paketimet e kanabisit të sekuestruare nga policia në banesën e tij në Wherstead Road.
Elezaj nuk iu përgjigj kërkesës për lirim me kusht dhe nuk u paraqit asnjë herë në stacionin e policisë në Kent dhe punonjësit e qendrës për të rinj ku ai duhej të akomodohej njoftuan se ai ishte larguar. Shërbimi i Prokurorisë së Kurorës më pas autorizoi akuza për veprat penale në Suffolk më 6 shtator 2024.
Më 21 shkurt 2025 Elezaj u kap nga Policia e Merseyside në një fabrikë kanabisi. Ai u akuzua dhe u la në paraburgim si për veprat penale në Merseyside ashtu edhe për ato të kryera në Suffolk.
“Nadir Elezaj ka treguar përbuzjen e tij të qartë për sistemin e drejtësisë, pasi u kap nga ne për vepra penale të drogës në Suffolk, ai nuk e përmbushi lirimin me kusht dhe u zhvendos në Merseyside ku vazhdoi të kryente të njëjtin aktivitet”, tha Rreshteri Dave Logan, i ekipit Sentinel South.
“Ai u gjet si rezultat i bastisjeve proaktive që synonin bandat e krimit të organizuar dhe ne jemi mirënjohës ndaj kolegëve tanë në Policinë e Merseyside për gjetjen e tij dhe sjelljen e tij para drejtësisë”, përfundoi Logan.
Top Channel
