Shtetasi Xhevahir Sinanaj është arrestuar këtë të enjte në qytetin e Vlorës, pasi mbante armë zjarri dhe një sasi me lëndë eksplozive plastike, për llogari të grupeve kriminale.
Gjatë operacionit policor në banesën e 57-vjeçarit, në fshatin Gorrisht, Selenicë, uniformat blu gjetën dhe sekuestruan 3 armë zjarri, te fshehura në çantë; një sasi lëndë eksplozive plastike e ndarë në 10 kallëpe, gati në përdorim.
Njoftimi:
Finalizohet nga Sektori për Hetimin e Krimeve të Rënda dhe Seksioni për Mbështetjen Operacionale të Hetimit në DVP Vlorë, operacioni policor i koduar “Explosion”.
Falë inteligjencës policore dhe ndërhyrjes operacionale, bëhet e mundur sekuestrimi i 3 armëve zjarri dhe një sasie lënde eksplozive plastike të ndarë në 10 kallëpe.
Vihet në pranga një 57-vjeçar, Xhevair Sinanaj, i cili posedonte dhe mbante të fshehura armët dhe eksplozivin, dyshohet për llogari të grupeve kriminale.
Bazuar në të dhënat e siguruara nga inteligjenca policore, shërbimet e specializuara të DVP Vlorë, organizuan dhe finalizuan me sukses operacionin policor të koduar “Explosion”, duke goditur një rast të armëmbajtjes pa leje dhe posedimit të lëndëve eksplozive.
Gjatë operacionit, në fshatin Gorrisht, Selenicë, lagjja Rexhepaj, u arrestua në flagrancë shtetasi Xh. S., 57 vjeç, banues në këtë zonë.
Gjatë kontrollit të ushtruar pranë banesës së tij, u gjetën dhe sekuestruan në cilësinë e provës materiale:
•3 armë zjarri, të fshehura në një çantë.
•Një sasi lëndë eksplozive plastike, e ndarë në 10 kallëpe, gati për përdorim.
Nga hetimet rezulton se këto armë dhe lëndë eksplozive plastike dyshohen se mbaheshin të fshehura nga 57-vjeçari për llogari të grupeve kriminale, me qëllim përdorimin në aktivitete të paligjshme.
Nën drejtimin e Prokurorisë, vijojnë hetimet për të identifikuar personat e tjerë të përfshirë në këtë veprimtari kriminale.
Materialet procedurale i kaluan Prokurorisë, për veprime të mëtejshme.
Top Channel
Ndalohet nga policia dhëndri i ish-kryebashkiakut të Elbasanit, Qazim Sejdinit 
