![](https://top-channel.tv/wp-content/uploads/2024/09/MixCollage-07-Sep-2024-05-33-PM-5997-800x450.jpg)
Udhëheqësi izraelit Benjamin Netanyahu është shprehur se Izraeli po ndihmon pacientët duke krijuar korridore të sigurta mes luftimeve në terren, megjithatë bëri të qartë se nuk do t’i jepet imunitet terroristëve të Hamasit.
Në një intervistë për CNN, Netanyahu tha se: “Ne kemi caktuar rrugë për në një zonë të sigurt në jug të qytetit të Gazës dhe duam që të gjithë civilët të largohen nga rreziku.”
Por, ai theksoi se Hamasi “po bën gjithçka në fuqinë e tij për t’i mbajtur ata në rrugën e keqe”.
“Ne kemi bërë thirrje për të evakuuar të gjithë pacientët nga ai spital (Al-Shifa, më i madhi i Gazës) dhe rreth 100 janë evakuuar tashmë”, tha Netanyahu për CNN.
“Nuk ka asnjë arsye pse ne nuk mund t’i nxjerrim pacientët nga atje.”
CNN nuk mund t’i verifikojë këto pretendime. Izraeli më herët njoftoi një korridor pranë Al-Shifa, por Komiteti Ndërkombëtar i Kryqit të Kuq tha se nuk mund të konfirmonte nëse kishte ndodhur ndonjë evakuim.
Në vija të përgjithshme të politikës ndërkombëtare, Netanyahu iu përgjigj kritikëve të Izraelit duke vënë në pikëpyetje se çfarë do të bënin Shtetet e Bashkuara në të njëjtën situatë, nëse “50,000 amerikanë” do të ishin vrarë dhe “10,000 të tjerë do të mbaheshin (si) pengje, duke përfshirë foshnja, gra dhe fëmijë”.
“Do të merrte të gjithë forcën e saj dhe do të shkonte pas këtyre vrasësve. Po sikur këta vrasës të futeshin në spitale dhe shkolla?”- pyeti ai.
Luftimet e ashpra pranë spitalit më të madh të Gazës e kanë lënë atë në një “situatë katastrofike”, me pacientë dhe staf të bllokuar brenda, ambulanca të paafta për të mbledhur të plagosurit dhe sistemet e mbështetjes për jetën pa energji elektrike, raportojnë zyrtarët shëndetësorë në Gaza dhe agjencitë e ndihmës.
Top Channel