Flakë gjigante dhe të shpejta, provinca kanadeze shpall gjendjen e jashtëzakonshme

Kryeministri David Eby paralajmëroi se “situata ka evoluar me shpejtësi dhe ne jemi në një situatë jashtëzakonisht sfiduese në ditët në vijim”.

Zjarri i McDougall Creek është rritur nga 64 në 6800 hektarë në 24 orë.

Rreth 4,800 njerëz janë tani nën urdhër evakuimi.

Më vete, rreth 22,000 njerëz – ose afërsisht gjysma e popullsisë – janë zhvendosur në Territoret Veriperëndimore të Kanadasë për shkak të një zjarri tjetër të madh.

Një afat zyrtar për evakuimin e Yellowknife, kryeqyteti i territorit federal të Kanadasë, ka skaduar.

Banorët janë përpjekur të largohen, në përpjekje për t’i shpëtuar një zjarri që lëviz drejt periferisë së qytetit.

“Këtë vit, ne po përballemi me sezonin më të keq të #BCWildfire ndonjëherë,” shkroi Eby të premten në një postim në X, i njohur më parë si Twitter. “Duke pasur parasysh këto kushte të shpejta, ne po shpallim një gjendje të jashtëzakonshme provinciale”.

Kryeministri tha se kjo do të siguronte që “ne jemi në një pozicion për të aksesuar me shpejtësi çdo mjet që na nevojitet për të mbështetur komunitetet”.

Ai tha se gjithnjë e më shumë njerëz po evakuoheshin, duke paralajmëruar se “urdhrat e urgjencës mund të përfshijnë kufizime të udhëtimit në zona specifike nëse njerëzit nuk respektojnë thirrjet tona për të shmangur udhëtimet jo thelbësore”.

Më herët, shefi i zjarrfikësve në West Kelowna, Jason Brolund e përshkroi zjarrin si “shkatërrues”. “Ne luftuam fort mbrëmë për të mbrojtur komunitetin tonë,” shtoi ai.

Zyrtarët lokalë kanë raportuar tashmë “humbje të konsiderueshme strukturore” në zonë, duke përfshirë në Trader’s Cove, në veri të West Kelowna.

Asnjë vdekje nuk është raportuar deri më tani.

Hapësira ajrore rreth Aeroportit Ndërkombëtar Kelowna tani është mbyllur për gjithçka tjetër përveç zjarrfikësve ajrore.