Anija e sanksionuar ruse fundoset në Detin Mesdhe 24/12 13:37
Një ish-mbrojtës i kampionatit anglez të futbollit Premier League është burgosur sot për mashtrim ndaj miqve, familjarëve dhe bashkëpunëtorëve të tij me të paktën 8 milionë paundë në një skemë piramidale.
Lojtari i skuadrës Charlton Athletic, Richard Rufus është shpallur fajtor për mashtrim, pastrim parash dhe aktivitet të kontrolluar pa autorizimin e nevojshëm.
Prokurorët thonin se ai pretendonte se ishte ‘agjent burse’ dhe nxiste viktimat të “investonin” në skemën e tij që quante “me nivel të ulët rreziku”.
48 vjecari Rufus, u burgos për shtatë vjet e gjysmë nga gjykata e Southwark.
Ai kishte lënë futbollin në vitin 2004 pas një dëmtimi në gju.
Prokurori Roger Makanjuola, përshkruante veprimet e Rufus si “të papërgjegjshme dhe egoiste”, duke shtuar se futbollisti përdorte statusin e tij si sportist profesionist dhe anëtar i respektuar kishe, për të bindur viktimat në mashtrim.
“Pas humbjeve të pjesëmarrësve prej rreth 2 milionë paundë me justifikime investimesh, u zbulua se ato nuk ishin transferuar kurrë në llogarinë e tij në bursë. Ne tashmë kemi nisur konfiskimin e fitimeve të tij të jashtëligjshme”.
Rufus pretendonte se ishte një agjent burse me eksperiencë, por në fakt përdorte paratë e viktimave për të rimbursuar të tjerë “investues” në një formë skeme piramidale, thuhet në deklaratë.
Nga rreth 15 milionë paundë që ishin paguar në llogaritë e kontrolluara nga Rufus, investitorët arritën të merrnin gjysmën, ose rreth 7.6mln.
Policia tha se skema e tij kishte nisur nga maji 2007 deri në fund të 2010.
Gjatë këtij procesi, policia tha se ishin shkatërruar lidhje mes miqsh e familjarësh, shumë prej të cilëve pësuan humbje të rënda financiare dhe probleme të shëndetit mendor.
Rufus ndërkohë kishte shpenzuar më shumë se £300,000 për stilin e tij luksoz të jetesës duke blerë makina të shtrenjta, veshje e udhëtime.
Top Channel
