Gushti i kthimit në shtëpi! Dita e parë e muajit sjell fluks në portin e Durrësit

Në korrik, 85 mijë persona hynë në vend përmes portit detar të Durrësit, ndërsa një tjetër fluks në hyrje pritet gjatë dy javëve të para të gushtit. Edhe pse e hënë,  4.700 udhëtarë dhe 2.800 automjete mbërritën me tragetet e linjës së Barit dhe Ankonës.

Për të përballuar këtë fluks po punohet me kapacitet të plotë nga autoritetet kufitare dhe doganore, po ngarkesa krijon dhe ndonjë pakënaqësi.

”Jeta është e shtrenjtë dhe marrim masa, dhe në këtë moshë dëshira për jetën është më e madhe”, thotë një grua.

”Shumë ndryshime. Pushimet në Durrës për momentin. Pas 2 vjetësh që vij më duket mirë, po çmimet të larta”, shprehet një tjetër.

 ”Këtu vijmë gjithmonë. Këtu i kalojmë pushimet, por këtë filmimin duhet ta bëni nga ana tjetër, sepse shumë radhë. Sportelet ishin, po nuk e përballonin. E lodhshme është rruga që bëjmë, po e gjejmë dhe pak të lodhshme këtu. Duhet të zgjerohen sportelet në periudhën e pushimeve”, shprehet turisti.

Malli dhe dëshira për të kontribuar në këtë sezon turistik sjellin jo vetëm shumë emigrantë në atdhe, por edhe shumë turistë të huaj që ndalesën e parë e bëjnë në qytetin antik.

”Durrësi është i mrekullueshëm. E gjithë Shqipëria është një vend shumë i mirë.  Gjithçka. Njerëz shumë të mirë, klimë shumë e mirë, hotele shumë të mira. I rekomandoj të gjithë të vijnë këtu për pushime. Jam nga Madridi dhe më pëlqen shumë këtu”, thotë turistja me kapele.

Gennaro, një punonjës italian në tragetin e linjës së Ankonës teksa tregon se çdo vit e më shumë rritet numri i udhëtarëve në tragetet drejt Shqipërisë, ka dhe një mesazh për bashkëkombasit e tij.

”Të them të vërtetën Shqipëria na pëlqen shumë. Fluksi deri në mes të gushtit është në rritje. Çdo vit rritet numri i njerëzve që vijnë dhe u propozoj të gjithëve të vijnë pasi është një vend shumë i bukur”.

Top Channel