Pushtimi rus, Ukraina ka humbur 40% të tokës që kontrollonte në rajonin Kursk të Rusisë 24/11 18:00
Ankaraja ka paralajmëruar se situata aktuale mund të ketë efekte afatgjata.
Zëdhënësi i presidentit të Turqisë tha sot se lufta në Ukrainë është një “Luftë e Ftohtë e epokës së re”, me pasoja që do të zgjasin për disa dekada.
Duke komentuar në rrjetin Twitter parashikimet e tij të vrazhda, Ibrahim Kalin tha se kriza në Ukrainë vijon të thellohet, prandaj “të kërkuarit e një balance të re fuqie, së bashku me llogaritjet për përfitime afat-shkurtra, do të shkaktojnë dramë të madhe njerëzore dhe humbje strategjike, në terma afatmesme e afatgjata.”
“Kemi hyrë në një ‘Luftë të Ftohtë’ të epokës së re. Efektet e kësaj lufte do të zgjasin për dekada,” shkruante Kalin i cili ka qenë zëdhënësi i liderit turk Rexhep Tajip Erdogan, prej vitit 2014.
Që prej nisjes së ofensivës së Moskës më 24 shkurt, Turqia ka ruajtur një pozitë ‘neutrale’ duke nxitur për bisedime paqeje e duke paralajmëruar Perëndimin kundër tentativave të izolimit të Rusisë, duke u përpjekur të veprojë si një ndërmjetësuese mes Moskës e Kievit. Ankaraja ka refuzuar të vendosë sanksione ndaj Rusisë dhe ka ruajtur kanalet diplomatike me të dyja palët.
Gjatë javëve të fundit tensionet mes Rusisë e Perëndimit janë rritur dhe kërcënimi i një tjetër Lufte të Ftohtë është shprehur edhe nga të tjerë.
Në fillim të muajit ministri i jashtëm kinez Wang Wenbin akuzoi SHBA për “mentalitet të Luftës së Ftohtë” duke i bërë thirrje të ndryshojë “praktikën e krijimit të armiqve imagjinarë apo të konfrontimit të blloqeve”.
Top Channel
