Mijëra video të grave në Oktoberfest në Mynih përfundojnë në internet, rritet shqetësimi për filmimet e fshehta 02/10 21:26
Skema e ngjyrave
Madhësia e shkrimit
Argjentina po përgatitet të lançojë një program të ri që u mundëson të huajve të pasur të marrin shtetësinë argjentinase në këmbim të pagesave ose investimeve të konsiderueshme, në një përpjekje të qeverisë së presidentit Javier Milei për të siguruar burime të reja financimi dhe dollarë për vendin.
Ministri i Ekonomisë, Luis Caputo, prezantoi skemën e ashtuquajtur “pasaportë e artë” gjatë një aktiviteti me investitorë në Paris. Sipas tij, aplikimet për programin pritet të hapen para fundit të këtij viti.
Aplikantët do të kenë dy mundësi. E para është një kontribut i pakthyeshëm prej 311 mijë eurosh në Thesarin e Argjentinës. Mundësia e dytë është investimi i 711 mijë eurove në një obligacion të ri qeveritar, i cili duhet të mbahet për shtatë vjet.
Shuma do të ndryshojë në varësi të madhësisë së familjes. Për një familje me katër persona, kontributi pritet të arrijë në rreth 444 mijë euro.
Nisma vjen në një moment kur qeveria argjentinase po përballet me nevoja të mëdha financiare. Thesari pritet të ketë rreth 22 miliardë euro pagesa të borxhit në valutë të huaj gjatë vitit 2027.
Një konsorcium kompanish investimi që këshillon qeverinë ka vlerësuar se programi mund t’i sigurojë Argjentinës deri në 2.2 miliardë euro, nëse regjistrohet numri i parashikuar i aplikantëve.
Programet e ngjashme, të njohura si “viza të arta”, janë përdorur nga dhjetëra vende për të tërhequr kapital të huaj. Programet e shtetësisë në këmbim të investimeve janë më të rralla dhe u ofrojnë aplikantëve, përveç të drejtës së qëndrimit, edhe pasaportën e vendit.
Argjentina pritet të bëhet vendi i parë i Amerikës së Jugut që vendos një program të tillë.
Ministri Caputo tha se pasaporta argjentinase është e vlefshme për udhëtime pa vizë paraprake në më shumë se 140 vende, përfshirë destinacione në Evropë, Azi dhe Amerikën Latine.
Ekspertët e industrisë së migracionit përmes investimeve thonë se kjo mund të jetë veçanërisht tërheqëse për persona të pasur nga vende ku qytetarët përballen me kufizime të mëdha për udhëtimet ndërkombëtare.
Programet e shtetësisë përmes investimeve janë bërë gjithashtu më tërheqëse për disa amerikanë dhe evropianë, të cilët kërkojnë një bazë alternative jashtë vendit në një periudhë pasigurie gjeopolitike.
Skemat e shtetësisë në këmbim të investimeve janë kritikuar prej vitesh për rrezikun e korrupsionit dhe pastrimit të parave.
Task-Forca e Veprimit Financiar, organizata ndërkombëtare që merret me luftën kundër pastrimit të parave, ka paralajmëruar se programe të tilla mund të shfrytëzohen nga persona të përfshirë në aktivitete kriminale për të fshehur identitetin, pasuritë ose për t’iu shmangur drejtësisë.
Në prill të vitit 2025, gjykata më e lartë e Bashkimit Evropian e shpalli të paligjshëm programin e “pasaportave të arta” të Maltës, duke argumentuar se shtetësia e BE-së nuk mund të shitej.
Për të shmangur rreziqe të tilla, Caputo tha se aplikantët do t’i nënshtrohen kontrolleve nga agjencitë e inteligjencës dhe autoritetet e mbikëqyrjes financiare. Verifikimet do të përfshijnë identitetin, të dhënat penale dhe burimin e fondeve.
Sipas ministrit argjentinas, objektivi kryesor është të ruhet “reputacioni ndërkombëtar i shtetësisë argjentinase”, ndërsa vendi përpiqet të tërheqë kapital të huaj dhe investitorë të pasur.
Top Channel
