Policia e Elbasanit ka çuar në pranga 4 persona dhe pa proceduar penalisht një tjetër për disa vepra të ndryshme penale.
Mes të arrestuarve është një 32-vjeçar, i cili shkaktoi një aksident me pasojë plagosjen e një 21-vjeçari, i fundit ky që ndodhet në spitalin e Traumës, jashtë rrezikut për jetën. I plagosuri është proceduar penalisht për kryerjen e veprës penale “Drejtimi i automjeteve në mënyrë të parregullt”.
“Specialistët e Trafikut Urban dhe Interurban në DVP Elbasan bënë arrestimin në flagrancë për veprën penale “Shkelja e rregullave të qarkullimit rrugor”, të shtetasit L. N., 32 vjeç, banues në Librazhd, dhe proceduan penalisht për veprën penale “Drejtimi i automjeteve në mënyrë të parregullt”, shtetasin B. P., 21 vjeç, banues në Librazhd, pasi ditën e djeshme, në aksin rrugor “Librazhd-Prrenjas”, në fshatin Hotolisht, shtetasi L. N., duke drejtuar mjetin tip “Audi”, ka goditur motomjetin me drejtues shtetasin B. P., i papajisur me leje drejtimi. Për pasojë është dëmtuar shtetasi B. P., i cili ndodhet në Spitalin e Traumës Tiranë, jashtë rrezikut për jetën”, njofton policia
Po ashtu u arrestua edhe shtetasi Xh. K., 21 vjeç, banues në Elbasan, pasi, në fshatin Rrapun, u kap nga shërbimet e Policisë Rrugore, duke drejtuar mjetin, në gjendje të dehur.
Specialistët për Hetimin e Krimeve në Komisariatin e Policisë Elbasan bënë arrestimin në flagrancë për veprat penale “Prodhimi, mbajtja, blerja apo shitja pa leje e armëve të ftohta” dhe “Mosbindja ndaj urdhrit të punonjësit të policisë së rendit publik”, të shtetasit K. K., 26 vjeç, banues në Elbasan, pasi në lagjen “Luigj Gurakuqi”, gjatë kontrollit fizik, ka kundërshtuar shërbimet e Policisë, të cilat i gjetën dhe sekuestruan në cilësinë e provës materiale një dorezë metalike.
Po nga specialistët e Hetimit të Krimit në Komisariatin e Policisë Elbasan u bë arrestimi në flagrancë i shtetasit A. Q., 47 vjec, banues në Elbasan, pasi ka shkelur masën e sigurisë “Arrest në shtëpi” dhe është konstatuar nga shërbimet e Policisë, jashtë banesës.
Materialet i kaluan Prokurorisë, për veprime të mëtejshme procedurale.
Top Channel
