![](https://top-channel.tv/wp-content/uploads/2024/09/kf_sd-800x450.jpg)
Gjykata e Bosnje dhe Hercegovinës ka urdhëruar ndalimin e gjeneralit në pension Milomir Savçiq, pasi ai mohoi faktet e vendosura nga gjykata mbi gjenocidin e Srebrenicës në disa paraqitje publike.
Savçiç, 62-vjeç, është paraqitur në gjyq në Gjykatën e BeH në vitin 2020, nën akuzat për krime lufte, përfshirë ndihmën dhe mbështetjen e gjenocidit të më shumë se 8.000 burrave dhe djemve boshnjakë të Srebrenicës.
Gjykata më parë e lejoi atë të qëndrojë në liri derisa të zgjasë gjykimi i tij, por me ndalimin e paraqitjeve publike dhe komentimin e fakteve që lidhen me atë procedurë, të cilat i referoheshin edhe karakterit të krimeve për të cilat akuzohet.
Tani, me kërkesë të Zyrës së Prokurorit të BeH, atij i është caktuar paraburgimi për të paktën një muaj.
Gjykata pranoi vërejtjet e prokurorit Ibra Buliç, i cili tha se Savçiç kishte shkelur masat e ndalimit pasi kishte vënë në dyshim publikisht kualifikimet në aktakuzën kundër tij. Ai gjithashtu kundërshtoi ndryshimet në Kodin Penal të BeH, të cilat i vendosi ish-përfaqësuesi i Lartë për BeH Valentin Inzko, për dënime me burg për ata që mohojnë krimet e luftës, përfshirë gjenocidin në Srebrenicë.
Savçiq u tha mediave serbe se ai ishte kundër “dogmës së Srebrenicës”, duke u bërë thirrje serbëve të vazhdojnë të dëshmojnë se atje nuk kishte gjenocid.
Bazuar në vendimin e gjykatës, Savçiç duhet të ndalohet menjëherë, edhe pse avokati i tij Miodrag Stojanoviç njoftoi se do të apelonte.
Gjatë luftës në BeH, Savçiç ishte një nga bashkëpunëtorët më të afërt të Ratko Mlladiq, i dënuar me burgim të përjetshëm para Gjykatës Penale Ndërkombëtare për ish -Jugosllavinë (MICT) në fillim të këtij viti pasi u shpall fajtor për krime lufte.
Ndër të tjera, Savçiç shërbeu si komandant i regjimentit të mbrojtjes në selinë e ushtrisë të kryesuar nga krimineli Mlladiç.
Sipas aktakuzës, anëtarët e regjimentit të Savçiç u përfshinë drejtpërdrejt në vrasjet e të paktën një mijë boshnjakëve të zënë robër në Nova Kasaba.
Top Channel