Problemet nuk kanë fund për Real Madridin, ylli francez dëmtohet dhe do të mungojë për tre javë 28/11 14:29
Turneu i tenisit në Lojërat Olimpike të Tokios vazhdon të prodhojë surpriza të mëdha dhe radhën për t’i dhënë lamtumirën Olimpiadës së 32 këtë herë e pati vetë numri 4 i botës Stefanos Tsitsipas.
Ditën e mërkurë në kryeqytetin nipon zbritën 16 tenistët e mbetur për takimet e fazës së 1/8 dhe kalendari e vuri sportistin grek përballë numrit 28 në rruzull, francezit Ugo Humbert. 23-vjecari nga Metzi i cili triumfoi në Halle pesë javë më herët, duke mposhtur në finale rusin Andrey Rublev kishte fituar ndeshjen e vetme ndërmjet këtyre dy tenistëve, nëntorin e kaluar në Mastersin Francez në Paris – Bercy.
Një sukses shumë i veçantë i siguruar afërsisht nëntë muaj më parë në tre sete tepër të rivalizuar me tie break, pas pothuajse tre orë e gjysmë lojë, ndërsa këtë radhë Ugo Humbert përmbysi disavantazhin e setit hapës për të regjistruar një fitore të madhe ndaj njërit prej favoritëve kryesorë për marrjen e medaljes së artë në këtë sport, në Olimpiadën e Tokios.
22-vjecari nga Athina zbriti në Arenën e Ariake Coliseum të Tokios me statusin e numrit 3 të turneut dhe në fakt tenisti helen e theu dy herë me break kundërshtarin e tij të radhës, për të fituar thellë setin e parë të takimit, në diçka më shumë se gjysmë ore lojë.
Seti pasardhës vijoi i qetë dhe pa ngacmime, duke shtyrë llogaritë për në tie break, ku tenisti francez ruajti qetësinë dhe luajti më mirë. Fushat në tie break u ndërruan me rezultatin e barabartë 3-3, megjithatë në vazhdim Ugo Humbert mori 4 nga 5 pikët e radhës për të çuar ndeshjen në set final.
Seti përcaktues u dominua pothuajse gjatë gjithë kohës nga numri 28 në planet dhe në fakt pas humbjes së game-t hapës tenisti nga Metzi mori 6 nga 7 game-t e fundit të takimit, për të regjistruar një fitore të madhe me shifrat 2-6, 7-6, 6-2, në afërsisht dy orë e gjysmë lojë. Në pjesën e poshtme të shortit numri 14 i turneut Ugo Humbert do të masë forcat në fazën çerekfinale me rusin Karen Khachanov, që konsiderohet si raketa e 12 për nga fortësia në këtë aktivitet.
Kështu numri 25 i botës mundi numrin 13 në glob, 28-vjeçarin argjentinas Diego Schwartzman me shifrat 6-1, 2-6, 6-1 në dy orë, duke barazuar në 2-2 rezultatin e përgjithshëm të sfidave ndërmjet tyre, në turnetë ATP. Po në këtë anë të shortit respektuan parashikimet gjithashtu edhe dy tenistët e tjerë, spanjolli Pablo Carreno Busta dhe tenisti rus Daniil Medvedev që aktualisht mban vendin e dytë në botë. 30-vjeçari asturian që pozicionohet i 11 në botë mundi në më pak se dy orë lojë 7-6, 6-3 numrin 59 në planet, gjermanin Dominik Koepfer, ndërsa 25-vjecari moskovit regjistroi fitoren e gjashtë në gjashtë sfidat e fundit ndaj italianit Fabio Fognini.
Numri 31 në rruzull shfrytëzoi vetëm 1 nga 8 mundësitë për break, ndërkohë në krahun tjetër Daniil Medvedev e theu në servis plot 4 herë 34-vjecarin nga Sanremo dhe kështu në raundin tjetër tenisti i dytë për nga fortësia në këtë kompeticion do të përballet pikërisht me sportistin iberik Pablo Carreno Busta. Nuk patën probleme gjithashtu në pjesën e sipërme të shortit as rivalët e tjerë dhe tenistët kryesorë të këtij krahu i fituan pa shumë vështirësi ndeshjet e tyre.
Në këtë mënyrë Novak Djokovic favoriti absolut për të marrë medaljen e artë në singles dhe fituesi i tre turneve të mëdhenj Slam gjatë vitit 2021, në Melbourne, Paris dhe Wimbledon mundi bindshëm 6-3, 6-1 në më pak se një orë e gjysmë lojë 22-vjeçarin andaluzian Alejandro Davidovich Fokina, që renditet i 34 në planet, ndërsa idhulli vendas 31-vjeçari nipon Kei Nishikori që për momentin ka rrëshqitur në pozicionin e 69 në botë vuajti vetëm në setin hapës ndaj Ilya Ivashka-s, për të mbyllur më pas llogaritë me shifrat 7-6, 6-0, në një takim që zgjati për dy orë.
Interesant është fakti që gjatë setit të parë Nishi rekuperoi tre herë disavantazhin e një game me break, ndërsa në fund në tie break tenisti japonez i anuloi dy mundësi për setin 27-vjeçarit bjellorus. Përfundimisht në fazën tjetër Kei Nishikori do të sfidojë pikërisht numrin 1 të botës Novak Djokovic, ndërsa në duelin e fundit çerekfinal gjermani Alexander Zverev do të përballet me francezin Jeremy Chardy.
Sascha mundi 6-4, 7-6 numrin 41 në rruzull, 29-vjeçarin gjeorgjian Nikoloz Basilashvili, ndërsa numri 68 në glob Jeremy Chardy pati nevojë për tre sete për të mposhtur tenistin britanik Liam Broady. 34-vjeçari francez e mundi 27-vjeçarin nga Stockporti, që mban aktualisht numrin 143 në planet me rezultatin 7-6, 4-6, 6-1 në 2h 37’ lojë, duke fituar praktikisht edhe ndeshjen më të gjatë të ditës.
Top Channel
