Fiks Fare/ Çudia në Shkodër, dy familje të dënuara nga gjykata për të njëjtin ndërtim!

27/01/2021 20:40

Fiks Fare denoncoi mbrëmjen e të mërkurës një çudi në Shkodër, ku dy familje janë dënuar nga gjykata për të njëjtin ndërtim pa leje.

Në redaksinë e emisionit investigativ u ankua Luljeta Shyti, e cila tha se familja e saj është dënuar me një gjobë prej 7 milionë e 200 mijë lekësh të vjetër. Masa administrative është marrë në vitin 2013, ndërsa është shqyrtuar edhe nga Gjykata e Shkodrës. Kjo e fundit ka lëshuar urdhrin e ekzekutimit, ku Inspektoriati i Ndërtimit pranë Bashkisë së Shkodrës duhet t’ia vilte kësaj familje.

Por, disa muaj pas vendimit të parë, e njëjta gjykatë dënon penalisht z.Tom Delija me kusht, i cili pranon para trupit gjykues se godinën e ka ndërtuar ai. Por, cili dënim po ekzekuton Inspektoriati Ndërtimit i Bashkisë Shkodër? Familja Shyti thotë se ka pasur shumë probleme, madje u janë bllokuar edhe pagat. Ata denoncojnë se pas vendimit të dënimit nga INUV nuk janë lajmëruar asnjëherë. Madje, nuk u lajmëruan edhe pas dhënies së vendimit të gjykatës, në dhjetor të vitit 2013. “Nuk e kemi bërë ne atë ndërtim. E di edhe INUV-i. Por, përsëri nuk e pranojnë gabimin. Personi që ka ndërtuar pa leje, Tom Delija, është dënuar nga gjykata. E ka pranuar. Por, sërish ne na thonë të hapim gjyq” pohon zonja Luljeta. Ajo pohon se ka shkuar shumë herë në Bashkinë e Shkodrës, por sërish nuk ka marrë asnjë përgjigje apo zgjidhje të problemit.

Pas kësaj ankese, gazetarët e Fiks Fare, kontaktojnë me z.Tom Delija. Ky i fundit pranon se e ka bërë ai ndërtimin. “Po, unë e kam ndërtuar. Jam dënuar me kush për atë objekt. Është i njëjti objekt që është dënuar Ndue Shyti” pohon ai. Më tej shton se dokumentet janë në prokurori dhe gjykatë. Gazetarët shkojnë në gjykatë dhe kërkojnë pikërisht dënimet e familjeve Shyti dhe Delija. Vendimi për familjen Shyti është dhënë në dhjetor të vitit 2013, ku kjo familje duhet të paguajë 7.2 milionë lekë të vjetra gjobë për ndërtim pa leje. Dhe vendimi i dytë, është dhënë në muajin qershor 2014, ku z.Tom Delija është dënuar penalisht vetëm me kusht. Fiksi krahasoi vendimet dhe rezultojnë se janë për të njëjtin objekt, pikërisht për masën administrative të INUV Shkodër të datës 27 shtator 2013, ku në këtë masë është gjobitur gabimisht z.Ndue Shyti. Sipas vendimit, bëhet fjalë për ndërtimin në rrugën “Lëvizja e Postribës”, madje në këtë vendim është cilësuar edhe numri si dhe data e gjobës së INUV.

Fiksi interesohet edhe në Bashkinë Shkodër, se me çfarë dokumentesh dhe adresash është marrë masa administrative ndaj familjes Shyti. Bashkia e Shkodër na dërgon dy dokumente, vendimin e gjobës dhe njoftimin e kësaj mase administrative. Por, në asnjërën prej këtyre dokumenteve, nuk është adresa e saktë e ndërtimit pa leje. Në dokumente shkruhet vetëm rruga “Lëvizja e Postribës”, përballë fabrikës së qumështit. Por, përballë kësaj fabrike ka me dhjetëra shtëpi dhe ndërtime pa leje.

Fiks Fare i kërkoi bashkisë nëse ka apo jo foto të këtij ndërtimi apo nëse janë vënë në dijeni të vendimit të gjykatës. Në gjykatë pronari Tom Delija ka pranuar se e ka ndërtuar ai. Deri në transmetimin e këtij investigimi, Bashkia nuk na ktheu përgjigje për dy pyetjet e fundit.

FOTO GALERI

1/9