Bijon Pooladrag është emri i iranianit të arrestuar dhe që akuzohet për spiunazh e sulme kibernetike. Burime për gazetaren e Top Channel, Anila Hoxha bëjnë me dije se ka qenë një grua që ka kallëzuar se në të dhënat e saj ishte bërë një ndërhyrje.
Megjithatë para gjykatës 46-vjeçari nga Irani ka mohuar akuzat duke thënë se nuk ka asnjë lidhje me spiunazhin apo me sulmet kibenretike.
“Isha në shtëpi me qira. Rrija tek rruga ‘5 Maj’. Kam luftuar për lirinë ne Irak, ja mora telefonin të zonjës së shtëpisë dhe nuk kam ndërhyrë në rrjet”mësohet të ketë deklaruar iraniani.
Por prokurori pretendon se ai shfrytëzoi besimin e kallëzeuses dhe përmes telefonit të saj u fut në rrjet dhe merrte të dhëna.
“Sendet që më keni gjetur i kam siguruar në plehra, s’kam lidhje me çfarë më dyshoni” ka thënë i arrestuari.
Mbi 46-vjeçarin rëndojnë katër akuza, ndërsa Top Channel mëson se i dyshuari hyri në Shqipëri në 2016 dhe filloi veprimtarinë kundër anëtarëve të Mek. Ai përmes një aplikacioni komunikonte me të tjerë duke u lidhur me numrat e telefonit të shtetasve të ndryshëm.
Pas këtij veprimi policia shton se iraniani siguronte kodin e verifikimit të aplikacionit duke e bërë të disponueshëm në aparatet e tij kompjuterike. Policia gjeti në banesen e tij tre dokumente identifikimi dhe një sërë dokumentash të tjera nën hetim,10 karta sim, katër aparate celulare dhe një usb.
Policia shton se iraniani i ndaluar u zbulua në kuadër të një hetimi të shpejtë dhe për të parandaluar përshkallëzimin e situatës kriminale.
Top Channel
