Opozitari rus, Alexei Navalny, doli nga spitali Charite në Berlin ku mori trajtimin mjekësor.
Spitali Charite, në një deklaratë me shkrim njoftoi se gjendja shëndetësore e Navalny i cili ka qëndruar në spital që nga 22 gushti e deri më tani, është e mirë.
Në deklaratën ku thuhet se Navalny ka dalë dje nga spitali pas përfundimit të trajtimit, theksohet se mjekët mendojnë se Navalny mund të arrijë plotësisht shëndetin e mëparshëm, por që rezultatet afatgjate të helmimit të rëndë mund të vlerësohen më pas.
Ndërkohë nuk është bërë ndonjë deklaratë se kur do të kthehet Navalny në Rusi.
Pretendimi për helmimin e Navalny
Navalny, u përkeqësua më 20 gusht në një fluturim nga qyteti siberian Tomsk për në Moskë. Avioni bëri ulje emergjente në Omsk dhe Navalny u dërgua me urgjencë në një spital, ku kaloi dy ditë para se të dërgohej në Berlin për mjekim.
Pas shtrimit në një spital në qytetin Omsk, u pretendua se Navalny ishte helmuar me një substancë të përzier në çajin e tij. Rikujtohet se 44-vjeçari Navalny u transferua me 22 gusht nga Omsk në spitalin privat Charite në Berlin të Gjermanisë.
Zëdhënësi i qeverisë gjermane, Steffen Seibert, me një deklaratë më 2 shtator njoftoi se përfundimisht kanë përcaktuar që Navalny është helmuar me një kimikat nga grupi i Noviçok që përdoret në luftën kundër sëmundjeve nervore.
Seibert, edhe më 14 shtator theksoi se helmimi i Navalny është konfirmuar edhe nga dy laboratorë të pavarur në Suedi dhe në Francë. Spitali Charite më 7 shtator informoi se situata shëndetësore e Navalny është përmirësuar dhe se ka dalë nga koma.
Ekipi i Navalny pretendoi se kimikati i grupit të Noviçok është gjetur në një shishe në dhomën e hotelit ku Nanalny ka qëndruar më parë në qytetin Tomsk.
Top Channel
