Mastersi i Majemit, Del Potro kalon; Dimitrov “ngec”

Tenisti argjentinas, fituesi i Indian Uellsit, i cili aktualisht është numri 6 i botës, u kualifikua për në 1/8 e finaleve të turneut Masters të Majemit pasi mundi në dy sete Kei Nishikorin. Del Potro nuk e pati aspak të vështirë përballjen me japonezin, të cilin e mundi në vetëm 1 orë e 14 minuta lojë, me setet që i mbylli me të njëjtin rezultat: 6-2. Kundërshtari i radhës së Del Potros do të jetë serbi Filip Krajinoviç, i cili mundi francezin Paire.

U kualifikua mes 16 më të mirëve të Mastersit të Majemit edhe Marin Çiliç, i cili eliminoi kanadezin Pospisil me rezultatin 2-0. Ishte një sfidë e ekuilibruar ajo e zhvilluar mes dy tenistëve, me kroatin që në fund arriti të fitojë të dyja setet 7-5 dhe 7-6.

Surprizën e ditës në turneun e Majemit e bëri Jeremy Chardy, i cili eleminoi Grigor Dimitrovin në dy sete. Francezi diti t’i imponohej bullgarit, i cili është numri 3 i renditjes botërore, teksa i fitoi të dyja setet me të njëjtin rezultat: 6-4.

Preu biletën për në 1/8 e finaleve të turneut në Florida edhe Milos Raoniç, pas fitores së arritur me argjentinasin Diego Schwartzman. Kanadezi fitoi setin e parë vetëm pas “tiebreak”-ut 7-6, ndërkohë që të dytin e pati më të lehtë dhe e mbylli 6-3.

Top Channel