Michael Flynn, dikur një nga njerëzit më të afërt të Donald Trump, ka vendosur që të mos flasë më me presidentin amerikan, për hetimin që po zhvillohet për ndërhyrjen e pretenduar ruse në zgjedhjet amerikane.
Më teknikisht, një avokat i ish-këshilltarit kombëtar për Sigurinë, Flynn, i tha ekipit ligjor të presidentit Trump se nuk do të komunikojnë më me ta për hetimin e prokurorit special, Robert Mueller.
Ky vendim, sipas ekspertëve mund të jetë një shenjë se Flynn do të bashkëpunojë me hetimin e Mueller, ose do të negociojë një marrëveshje për veten.
Vendimi i Flynn iu komunikua ekipit ligjor të presidentit këtë javë, sipas Associated Press, që konfirmon lajmin e “New York Times” që raportoi e para për këtë zhvillim.
Në hetimet e mëdha kriminale, avokatët mbrojtës ndajnë informacione më njeri-tjetrin, por ky shkëmbim bëhet jo etik, nëse një nga të dyshuarit përpiqet të bëjë një marrëveshje me prokurorët.
Avokatët e Flynn dhe djalit të tij, Michael Flynn Junior, i cili së fundmi është bërë objektiv i hetimit, nuk pranuan që të bëjnë komente për raportimet në medie.
Flynn u detyrua të japë dorëheqjen në shkurt, nga posti i Këshilltarit kombëtar për Sigurinë, pasi u zbulua se nuk kishte treguar të vërtetën për natyrën e kontakteve të tij me ambasadorin rus në SHBA.
Michael Flynn, një prej mbështetësve më të mëdhenj të fushatës së Trumpit, është një nga figurat kryesore në hetimit e Mueller, sidomos pasi ish-drejtori i FBI-së, James Comey deklaroi se presidenti Trump i kërkoi që të mos hetonte ish-këshilltarin e Sigurisë.
Top Channel
