“Serbia nuk luan dot me Kosovën”/ Deputeti gjerman, Thomas Hacker: Bisedime të reja pas zgjedhjeve
24/11 12:24
Kryeministri i Kosovës, Ramush Haradinaj, u takua te premten në Bruksel me Përfaqësuesen e Lartë të Bashkimit Evropian për Politikë të Jashtme dhe Siguri, Federica Mogherini.
Sipas një deklarate, Haradinaj dhe Mogherini biseduan për perspektivën dhe rrugën evropiane të Kosovës.
Kryeministri kosovar tha se me dinamiken e përcaktuar me qeverisjen e re është përshpejtuar edhe procesi i përmbushjes së Axhendës së Reformave Evropiane dhe kriteret e përcaktuara me Marrëveshjen e Stabilizim Asocimit.
Siç raporton Europa e Lirë, Haradinaj e bëri të qartë se Kosova është e përkushtuar dhe po punon për reformat në fushën e sundimit të ligjit, zhvillimin ekonomik, arsim e shëndetësi dhe synon që të arrijë deri në fund të vitit 2018 statusin e vendit kandidat për anëtarësim në BE.
Edhe këtë herë, ai nënvizoi rëndësinë e përmbylljes së procesit të liberalizimit të vizave për qytetarët e Kosovës. Haradinaj, vijon komunikata, tha se Kosova ka mbetur vendi i fundit dhe i vetmi në Evropë pa lirinë e lëvizjes dhe se përshpejtimi i këtij procesi do të ndihmonte qytetarët dhe vendin.
Ai theksoi se Kosova ka përmbushur detyrimet e saj në këtë proces dhe shtoi se kriteri i mbetur i marrëveshjes së demarkacionit me Malin e Zi, ka nisur te adresohet me fillimin e punës së komisionit të ri shtetëror.
Në takim me Përfaqësuesen e Lartë të BE-së, Federica Mogherini, morën pjesë edhe zëvendëskryeministri dhe ministër i Jashtëm, Behgjet Pacolli, dhe ministrja e Integrimeve Evropiane, Dhurata Hoxha.
Top Channel
