Siri, mbi 40 të vdekur nga atentatet në zemër të Damaskut

Lajmin e bën të ditur Observatori sirian për të drejtat e njeriut, i cituar nga edicioni online i Al Jazira.

Sipas Observatorit, me bazë në Britaninë e Madhe, një bombë shpërtheu gjatë kalimit të një autobusi dhe më pas një atentator vetëvrasës u hodh në erë.

Ministri i Brendshëm sirian, Mohammed Al Shaar ka konfirmuar bilancin e të vdekurve, por për të plagosurit ka saktësuar se bëhet fjalë për 120.

Ngjarja ndodhi pranë varrezave Bab al Saghir, ku ndodhen mauzoleumet e shiitëve, që dyshohet se po vinin me autobus. Militantët sunitë shpesh herë sulmojnë shiitët, por sulmet në kryeqytetin sirian nuk janë të shpeshta.

Një armëpushim mbarëkombëtar i ndërmjetësuar nga Rusia, Turqia dhe Irani hyri në fuqi më 30 dhjetor, por sulmet sporadike vazhdojnë.

Dy raunde të tjera bisedimesh mes përfaqësuesve të qeverisë dhe opozitës pritet të mbahen javën e ardhshme.

Damasku ndodhet kryesisht nën kontrollin e trupave të presidentit Bashar al Assad, por grupet rebele janë të pranishme në të gjitha rrethinat.

Top Channel