Gjenevë, arrestohen dy sirianë të dyshuar për lidhje me terrorizmin

Gjeneva aktivizoi nivelin maksimal të alarmit gjatë kësaj jave, mes frikës se një celulë e ISIS gjendej në zonë.

Presidentja zvicerane, Simonetta Sommaruga tha të premten se, përmes një autoriteti të huaj, të cilin nuk e identifikon, kishte siguruar informacione se një celulë e mundshme e Shtetit Islamik e kishte bazën në zonën e Gjenevës, e gjithsesi ajo shtoi se nuk kishte tregues se po planfikohej një sulm konkret.

Kryeprokurori i Gjenevës tha në një konferencë për shtyp se, dy shtetasit sirianë sapo kishin mbërritur në qytetin zviceran dhe nuk mund të flisnin frengjisht.

“Këta persona u vunë në qendër të kontrolleve të imtësishme për shkak të sjelljes dhe kombësisë së tyre. Nga kontrollet u zbuluan gjurmë eksplozivi në automjetin që ata po përdornin”, tha ai.

Media zvicerane raportoi të premten se, kishin qenë Shtetet e Bashkuara që kishin këshilluar autoritetet e Gjenevës, për terroristë të mundshëm që operonin në qytet.

E përditshmja “Le Temps”, duke cituar një burim të afërt me hetuesit tha se, inteligjenca amerikane kishte identifikuar 3 celula xhihadiste në Chicago, Toronto dhe Gjenevë.

Të enjten u shtuan masat e sigurisë jashtë sinagogave, godinës së OKB-së dhe banesës së ambasadorit francez, ashtu si dhe pranë stacioneve të trenave, aeroporteve dhe zonave të tjera të rrezikuara. U rrit gjithashtu edhe numri i policëve, që patrullonin rrugët.

Top Channel