Australi, trazira në qendrën pritëse të azilkërkuesve

Emigrantët kanë shqyer gardhin rrethues e u kanë vënë flakën disa ambienteve të qendrës në ishullin e krishtlindjeve. Raportet në disa media vendase tregojnë se, pas vdekjes së një emigranti, të ngriturit në protestë kanë marrë kontrollin e kompleksit, ndërsa rojet e sigurisë ia mbathën nga sytë këmbët.

Zyrtarët shpjegojnë se, për aq sa janë ata në dijeni, nga incidenti nuk ka të lënduar, ndërsa kufizohen të konfirmojnë se në ishullin e krishtlindjeve ka pasur “rrëmuja”. Ata shtojnë se po punohet për zgjidhjen e situatës, pa dhënë sidoqoftë detaje të mëtejshme.

Radio “Zelanda e Re” pretendon se, katalizatori i këtij shpërthimi të emigrantëve ishte gjetja e trupit të pajetë të një azilkërkuesi iraniano-kurd, i identifikuar nga shtypi australian si Fazel Chegeni.

“Na ka ardhur në majë të hundës, – citon radioja në fjalë një prej personave të përfshirë në trazira. – Është diçka që tashmë po e shohim shumë shpesh. Njerëzit përpiqen t’i bëjnë keq vetes, të vrasin veten. Janë të lodhur nga kjo situatë”.

Burri kërkoi të mbetej anonim, por në komentet e bëra për “RNZ”, ai ka folur me një theks të qartë neozelandez. E njëjta radio raporton gjithashtu se, protestuesit janë armatosur me shkopinj të rëndë druri e shufra hekuri, në përpjekje për t’u bërë rezistencë forcave të sigurisë, që janë riorganizuar e po tentojnë rimarrjen e kompleksit.

Një numër i madh neozelandezësh janë deportuar në ishull pas vendimit të fundit të Kanberrës për rishikimin e vizave të të gjithë personave me precedentë penalë. Lëvizja ngjalli kritika të ashpra, përfshir dhe ato të vetë kryeministrit të Zelandës së Re, John Key, i cili pretendon se një pjesë e të dëbuarve janë njerëz, që kanë kryer shkelje shumë të vogla e që në Australi kanë jetuar prej dekadash të tëra.

Top Channel