Rusia i ofron mbështetje Greqisë

Lavrov, në emër të qeverisë së Moskës, siguroi Greqinë se Rusia do të mund ta financojë vendin, për të lehtësuar sadopak  programet shtrënguese që Bashkimi Europian i ka vendosur Tsipras-it.

Sipas ministrit të Jashtëm rus , kjo ndihmë e tyre do t’i japë dorë rindërtimit të ekonomisë greke, ndërsa masat e Eurozonës thjesht do vazhdojnë ta zhysin vendin në një krizë më të thellë.

Disa analistë e shohin këtë si tentativë të Rusisë për ta mbajtur Greqinë larg unionit. Sipas tyre interesi është i dyanshëm, pasi Rusia është në kërkim të aleatëve politikë, ndërsa Greqia të aleateve  ekonomikë. Presidenti Vladimir Putin e ka ftuar zyrtarisht Alexis Tsipras  për të vizituar Moskën. Ndërsa më herët, kreu i Moskës ka thënë se vërtetë Bashkimi Evropian është i fortë për të rritur sanksionet ndaj Rusisë, por vetë ekonomia e Eurozonës gjendet mes kolapsit.

“Perëndimi nuk ka një strategji përtej sanksioneve, dhe ky është problemi i vërtetë I tyre”, ka deklaruar Putin.

Greqia u detyrua të pranojë disa raunde te shkurtimeve në shpenzimet publike si kusht për marrjen e një pakete ndihme nga vende të tjera anëtare të BE-së. Masat shtrënguese u priten me tensione nga populli  grek.

Pakënaqësia më e madhe e tyre vjen kryesisht nga  Gjermania, e cila i kërkon vazhdimisht Greqisë t’i qëndrojë strikte kushteve të marrëveshjes së vitit 2010, pavarësisht nga fakti se ajo nuk ka rezultuar  të japë ndonjë  shërim kuptimplotë ekonomik për vendin.

Top Channel